Транспарт балельшчыкаў будуць прапускаць па-за чаргой. Што тычыцца турыстаў, якія прыляцяць на чэмпіянат, то іх супрацоўнікі мытні таксама гатовыя аформіць у самыя кароткія тэрміны. На дапамогу прыйдуць і супрацоўнікі МУС. Яны арганізуюць у аэрапорце кругласутачнае дзяжурства.
Як яшчэ дапамогуць асвоіцца гасцям сусветнага першынства, распавядзе Юрый Шаўчук. Як тэатр пачынаецца з вешалкі, так візіт кожнага турыста пачынаецца з мяжы. Нягледзячы на тое, што на час сусветнага першынства для ўсіх удзельнікаў чэмпіянату свету па хакеі будзе дзейнічаць бязвізавы рэжым, прайсці кантроль будзе абавязаны кожны. Пры ўездзе толькі адзін прыпынак і той па спецыяльным канале.
Святлана Мардас, галоўны інспектар упраўлення арганізацыі мытнага кантролю ДМК Беларусі: Пропуск МС афіцыйных дэлегацый і балельшчыкаў, якія прыязджаюць на матчы праз аўтадарожныя пункты пропуску, будзе ажыццяўляцца ў прыярытэтным парадку. Адпаведныя дамоўленасці са службамі сумежных дзяржаў ужо дасягнуты. З 25 красавіка па 31 мая мытны кантроль такіх МС будзе ажыццяўляцца на спецыяльных калідорах, выдзеленых лагатыпам ЧМ па хакеі 2014.
Спецпалосы руху будуць працаваць у 14 асноўных аўтадарожных пунктах пропуску. Дзе, што і як - ужо зараз даступна на афіцыйным сайце мытні.
Тым часам Нацыянальны аэрапорт Мінск ужо даў справаздачу - яны гатовыя на ўсе 100%. Тут працуе сістэма двайнога калідора: чырвонага і зялёнага.
Святлана Мардас, галоўны інспектар упраўлення арганізацыі мытнага кантролю ДМК Беларусі: Час праходжання мытнага кантролю па зялёным калідоры складае 10-15 секунд. Па чырвоным калідоры з пісьмовым дэклараваннем і мытным афармленнем - ад 10-15 хвілін.
Гэтыя буклеты былі выраблены спецыяльна да сусветнага першынства. Карысная інфармацыя на англійскай, рускай, нямецкай і французскай мовах. На кожным экзэмпляры надрукаваны так званы QR-код. З дапамогай яго і спецыяльнага прыстасавання на тэлефоне можна за лічаныя секунды даведацца ўсё, што цікавіць, у Інтэрнэце. Дапамагчы гасцям асвоіцца і стварыць сваю памятку турыста вырашыла і беларуская міліцыя.
Усе, хто прыедзе на ЧМ па хакеі, павінны будуць зарэгістравацца па месцы пражывання. За пастаяльцаў гасцініцы ўсё зробіць абслуговы персанал. А вось госці, якія маюць намер здымаць кватэру, павінны будуць самі пра гэта паклапаціцца, але, як запэўнілі ў МУС, шмат часу гэтая працэдура не зойме.
