Колькасць пацярпелых ад гандлю людзьмі расце, нягледзячы на намаганні міжнароднай супольнасці па супрацьстаянні гэтай пагрозе. Пра гэта паведамілі на брыфінгу, прымеркаваным да Сусветнага дня барацьбы з трафікінгам.
Паводле звестак Міжнароднай арганізацыі па міграцыі, сёння ў свеце амаль 40 мільёнаў ахвяр гандлю людзьмі. 70 % з іх жанчыны і дзеці. Для нашай краіны барацьба з гэтай глабальнай праблемай - адзін з прыярытэтаў дзейнасці на міжнароднай арэне. Яшчэ ў сярэдзіне 2000-х афіцыйны Мінск пачаў актыўна прыцягваць увагу сусветнай супольнасці да гэтай праблемы.
Апошнія гады Беларусь працуе над паляпшэннем каардынацыі дзеянняў па барацьбе з гандлем людзьмі паміж дзяржавамі планеты. Дарэчы, Сусветны дзень барацьбы з трафікінгам - яго адзначаюць сёння - быў заснаваны і дзякуючы намаганням нашай краіны.
Праблема гандлю людзьмі існуе ва ўсіх краінах незалежна ад узроўню развіцця дзяржавы, падкрэсліваюць эксперты. Паводле звестак МУС, у нашай краіне сёлета ахвярамі сталі 68 чалавек. У ліпені на тэрыторыі Беларусі і Ізраіля прайшла сумесная спецаперацыя па затрыманні сямі грамадзян, што мелі дачыненне да арганізацыі секс-бізнесу.
Зараз пацярпелыя дзяўчаты знаходзяцца ў Ізраілі, ім забяспечана абарона. У МУС таксама падкрэсліваюць, што апошнім часам ахвярамі трафікінгу ўсё часцей становяцца і мужчыны. Тут, праўда, размова ідзе не пра сексуальную, а працоўную эксплуатацыю. Напрыклад, пры выездзе за мяжу на заробкі.
