Роўна 80 гадоў таму на адміністрацыйнай карце БССР з'явіліся Віцебская, Гомельская, Мінская і Магілёўская вобласці. Самыя маштабныя мерапрыемствы сёння праходзяць у цэнтры краіны. Рэгіён, дзе вырабляюць чвэрць усёй аграпрамысловай прадукцыі. Вобласць, якая вядома прафесіяналам і простым людзям дзякуючы солі зямлі - калійным угнаенням - і самым вялікім самазвалам у свеце! Мінская вобласць - гэта лідар па рэгіянальным ВУП у краіне, кожны трэці квадратны метр жылля ў краіне, а тавары, вырабленыя менавіта ў цэнтральным рэгіёне, карыстаюцца попытам у 140 краінах свету.
Расказвае Антаніна Станкевіч.
Мікалай Лашук нават не зусім аднагодак цэнтральнага рэгіёна. Мужчына старэйшы на цэлых 12 гадоў. Але яго асабістая гісторыя заўсёды ішла паралельна з гісторыяй Мінскай вобласці. У свае 92 мужчына з гонарам паказвае будынкі, якія ўзводзіў уласнымі рукамі ў пачатку 70-х. У Чэрвені на вуліцы Мінскай адначасова пабудавалі будаўнічы ліцэй і квадратныя метры для маладых спецыялістаў. А далей - болей: бальніца, кінатэатр, сярэдняя школа і дзіцячы дом-інтэрнат.
Сотні і тысячы дамоў, дзіцячых садоў і школ, бальніц, ферм і прадпрыемстваў - усяго і не пералічыць - пабудавалі за гэты час у цэнтральным рэгіёне. Двойчы ардэнаносная, узнагароджаная мноствам грамат і дыпломаў, сёння Мінская вобласць без перабольшання - вядучы рэгіён у краіне.
На гэтых фатаграфіях з аграрнага краю ў індустрыяльны рэгіён, ад калійных угнаенняў да БелАЗа.
Але не толькі калійнымі ўгнаеннямі і БелАЗамі знакамітая Мінская вобласць.
На гандлёва-эканамічным глобусе амаль не засталося месцаў, дзе б не прадаваліся тавары з цэнтральнага рэгіёна.
Напрыклад, у 2017 годзе масла з Барысава спадабалася ў Турцыі, а сухое малако са Слуцка - у Кітаі.
Чвэрць ад агульнарэспубліканскага каравая - заслуга хлебаробаў Мінскай вобласці.
А яшчэ сталічны раён - нумар адзін у краіне ў вытворчасці малака, гародніны, бульбы і мяса. Упершыню сабраны небывалы ўраджай цукровых буракоў.
У дзень нараджэння не толькі атрымліваюць падарункі, але і дораць іх. За выдатныя заслугі званне "Ганаровы грамадзянін Мінскай вобласці” атрымалі шэсць чалавек. Трактарыст, мастак, кампазітар, інжынер, кіраўнік - кожны занёс свой уклад у гісторыю цэнтральнага раёна.
Алімпійская чэмпіёнка Антаніна Кошаль і сёння не без гонару гаворыць аб сваёй малой радзіме - Смалявічах. Менавіта там маленькая дзяўчынка пачала шлях у свет вялікага спорту.
Наогул словы "дзень нараджэння" і "юбілей" у 2018 будуць гучаць у Мінскай вобласці даволі часта. Напрыклад, Салігорску - 60, Жодзіна спаўняецца 55 гадоў, а заводу-гіганту, якому гэты горад абавязаны сваім з'яўленнем, - 70 гадоў. І ў гэтым жа юбілейным годзе ў цэнтральным раёне з'явіцца яшчэ адзін прамысловы горад-сімвал: сваю працу пачнуць першыя прадпрыемствы ў індустрыяльным парку "Вялікі камень".
