3D-сканер з'явіўся на Брэсцкай мытні
"Варшаўскі мост" - найбуйнейшы пункт мытнага афармлення краіны. За суткі праз пагранпераход праязджаюць каля трох тысяч машын. Каб працэдура праходжання мяжы была хутчэй, сёння выкарыстоўваюць 3D-тэхналогіі.
Убачыць змесціва любой ёмістасці, не зазіраючы ўнутр: новая тэхніка на беларуска-польскай мяжы дазваляе распазнаць драбнюткія дэталі багажу. Удасканалены сканер працуе па прынцыпе рэнтгену. Некалькі секунд - і на экране манітора з'яўляецца аб'ёмны малюнак. Што знаходзіцца ў гэтым тэрмасе: вось ён знутры, і мы можам разгледзець цалкам гэты тэрмас.
Метал і арганічныя рэчывы сканер пазначае рознымі колерамі. Гэта таксама спрашчае і паскарае надгляд.
Брэсцкая - найстарэйшая мытня краіны. Тут пачалася гісторыя ўсёй службы. У дзень вялікага юбілею адзначылі лепшых супрацоўнікаў. Узнагароды сёння атрымалі сорак мытнікаў. Сямі з іх уручылі дзяржаўную ўзнагароду: медаль "За бездакорную службу".
Аляксандр Піхун, начальнік Брэсцкай мытні: "За мінулы год восем мільёнаў чалавек перасеклі мяжу ў зоне дзейнасці Брэсцкай мытні, гэта 85 % насельніцтва Рэспублікі Беларусь. Мы ўвесь час знаходзімся ў эксперыменце: гэта і дасканаласць тэхналогій афармлення, гэта і дасканаласць праграмных тэхналогій. Таму, вядома ж, будзем рухацца наперад".
Зараз мяжа ў чаканні навагодніх святаў. Для памежных і мытных служб - гэта гарачая пара: пасажырапаток павялічваецца ў разы. Паводле слоў супрацоўнікаў мытні, нягледзячы на гэта, падарожжа будзе камфортным: для гэтага ў пунктах пропуску сёння ёсць усе магчымасці.