У пасёлку Баравая прэзентавалі першы серыйны верталёт Мі-8МСБ, выпушчаны на Аршанскім авіярамонтным заводзе. Удасканаленая мадэль самага масавага ў свеце верталёта практычна па ўсіх параметрах апярэджвае стандартную мадыфікацыю: вышыня, хуткасць палёту, узлётная маса. Расход паліва пры гэтым ніжэйшы.
У чым сакрэт унікальных характарыстык, даведваўся Якаў Бута.
Кіраўнік Адміністрацыі Прэзідэнта Андрэй Кабякоў прызнаецца: дынаміка новай машыны здзіўляе. Надпіс Орша эйр на верталёце з украінскім сэрцам (рухавіком) абазначае беларускую вытворчасць. На Аршанскім авіярамонтным заводзе ўдыхнулі новае жыццё ў легендарную, самую масавую мадэль верталёта ў свеце - Мі-8. Дапамог у гэтым украінскі інвестар. Адзін з вядучых сусветных вытворцаў авіярухавікоў напрыканцы 2011-га выкупіў кантрольны пакет акцый аршанскага завода.
Андрэй Кабякоў, кіраўнік Адміністрацыі Прэзідэнта Беларусі: Яны прыйшлі сюды з новымі тэхналогіямі, з новымі рабочымі месцамі і прыйшлі ў тую сферу, якая вельмі важная як для беларускага рынку, так і для экспарту. Гэта той інвестар, які не займаецца спекулятыўнымі імгненнымі выгодамі, а ўзнімае наш тэхналагічны ўзровень і стадыю вытворчасці. У 2011 годзе на аршанскім прадпрыемстве быў Кіраўнік дзяржавы. Вы бачыце, якая там моцная і магутная матэрыяльная база, і ў яе зараз удыхнулі новае жыццё. Гэта тое, што нам трэба.
Вячаслаў Багуслаеў, кіраўнік кампаніі - вытворцы авіяцыйных рухавікоў (Украіна): Гэтая іншая якасць беларускай авіяцыйнай індустрыі. Вы будзеце рабіць тут беларускія верталёты з беларускімі пашпартамі. Гэта не проста рамонт, гэта выпуск беларускага верталёта.
Каля верталёта цэлы стэнд сусветных рэкордаў. Мі-8МСБ пакарыў Эверэст. Гэта значыць першым у свеце ўзяў вышыню 9 тысяч 150 метраў.
Удасканаленая версія верталёта Мі-8МСБ пераўзыходзіць стандартную мадыфікацыю практычна па ўсіх параметрах: вышыня, далёкасць палёту, узлётная маса. І пры гэтым расход паліва ніжэйшы.
Дзякуючы ўнікальным украінскім рухавікам максімальная вышыня палёту вырасла ўдвая. Эканомія паліва - каля 20 працэнтаў. Яшчэ адна важная перавага - рухавікі запусцяцца пры любой тэмпературы ад мінус 60 да плюс 60 градусаў. Раней праблемы ўзнікалі пры плюс 38-мі.
Зараз на Аршанскім авіярамонтным заводзе заканчваюць зборку другой такой машыны. А ў планах на наступны год ужо каля дваццаці верталётаў.
