Беларусы возьмуць удзел у кветкавым кубку на Мальце

20 Ліпеня 2016

Сцены з кветак, букеты ў садовым стылі і ворк-шопы ад знакамітых кветкавых майстроў. Беларуская фларыстыка выходзіць на міжнародную арэну.

На прэстыжным Кубку фларыстаў на Мальце нашу краіну прадставіць мінчанін Мікіта Баніс - аўтар самага прыгожага купальскага букета і вянка. Надзея Сербіненка даведалася, якія кветкі зараз ў модзе, і дзе рыхтуюць фларыстаў-прафесіяналаў.

Майстар-фларыст Юлія Халецкая робіць акцэнт на аўтарскіх букетах з экзатычных раслін. Мацыёлы, антурыумы, астыльбы, сандэрсоніі - іх у Мінск прывозяць з Эквадора, Калумбіі, Арабскіх Эміратаў і Галандыі. Мода на садовыя букеты далікатных, прыглушаных тонаў і выкарыстанне разнастайных скрынак і крафтавай паперы нядаўна ахапіла і Беларусь.

Сёння беларуская фларыстыка выходзіць на новы ўзровень майстэрства і эстэтыкі. Стымулююць да прафесійнага росту буйныя конкурсы і чэмпіянаты.

Пераможца фларыстычнага спаборніцтва «Купальская краса» Мікіта Баніс будзе прадстаўляць Беларусь на кветкавым кубку на Мальце. Зараз юнак актыўна рыхтуецца да выступлення.

Менавіта вясельны дэкор - адзін з самых запатрабаваных напрамкаў фларыстыкі.

Аб'ёмныя падвясныя канструкцыі - трэнд сучаснай фларыстыкі. Такая чатырохметровая сцяна не толькі ўпрыгожыць вясельную залу, але і стане выдатнай фотазонай.

Важную ролю ў падрыхтоўцы прафесійных фларыстаў адыгрывае пастаяннае навучанне. У Мінск усё часцей прыязджаюць знакамітыя майстры-фларысты з аўтарскімі ворк-шопамі і майстар-класамі.

Убачыць працу фларыстаў можна і на гэтых выхадных. У нядзелю ў батанічным садзе Мінска пройдзе першы беларускі фестываль прыродных узораў - мандал. Каманды фларыстаў, ландшафтных дызайнераў, мастакоў будуць ствараць кампазіцыі з прыродных матэрыялаў на вачах у наведвальнікаў.