Дзякуючы сучасным тэхналогіям беларускія антраполагі аднавілі аблічча чалавека, які жыў некалькі стагоддзяў таму. Скульптурны партрэт узноўлены метадам пластычнай рэканструкцыі чэрапа. Меркавана, гэта манах аднаго з найстаражытных праваслаўных цэнтраў нашай краіны - Лаўрышаўскага манастыра.
Пра навуковае даследаванне і яго візуальны вынік Алена Борматава. Скульптурны партрэт - вынік антрапалагічнай рэканструкцыі. У яе аснове методыка яшчэ савецкага антраполага Герасімава. Галоўнае - каб захаваўся чэрап, бо твар аднаўляюць метадам яго пластычнай рэканструкцыі. Поспех залежыць і ад ступені захаванасці. Першы этап - рэстаўрацыя чэрапа. Найбольш спрэчныя моманты аднаўлення твару - гэта нос і форма вушной ракавіны - храстковыя тканкі.
Астанкі чалавека были знойдзены два гады таму ў крыпце храма, што адносіцца да манастыра ў Лаўрышаве. Антрапалагічная экспертыза ўстанавіла яго ўзрост - ад 40 да 50 гадоў. Зараз паўстае пытанне аб правядзенні радыявугляроднага аналізу, каб вызначыць прыблізную даціроўку пахавання. Вынікі дапамогуць высветліць асобу чалавека. Пакуль існуюць толькі версіі.
Таксама ў планах экспертыза ДНК. Пакуль жа астанкі людзей, знойдзеныя ў царкоўнай крыпце, захоўваюцца ў алтарнай частцы аднаго з манастырскіх храмаў.
Аднавіць скульптурны партрэт другога чалавека пакуль немагчыма. Прычына - вельмі дрэннае захаванне костак чэрапа.
Пасля аднаўлення антраполагамі скульптурнага партрэта чалавека, які быў пахаваны некалькі стагоддзяў таму ў крыпце Лаўрышаўскага манастыра, не выключана магчымасць, што зараз рэканструяваны бюст манаха будзе дастаўлены ў музей духоўнага цэнтра.