І вось навіна апошняй гадзіны, якая мае каласальнае значэнне з пункта гледжання міжнародных адносін. Беларуская гуманітарная дапамога прыбыла ў Сірыю, і зараз ідзе яе разгрузка. У нас ёсць эксклюзіўныя кадры ўнікальнай спецаперацыі.
Літаральна сёння ў Сірыю прыбылі прадстаўнікі МНС Беларусі і разам з прадстаўнікамі пасольства і мясцовымі ўладамі пачалі разгрузку кантэйнераў з маркіроўкай BY. Гэта амаль 25 тон тавараў першай неабходнасці, а таксама прадукты харчавання. Затым пачнецца размеркаванне дапамогі: груз падзеляць на роўныя часткі і адправяць у тры сірыйскія правінцыі: Латакію, Хомс і Дамаск.
Гэта ўжо трэцяя гуманітарная дапамога, якую Беларусь аказвае сірыйскаму народу, але ўпершыню груз прыбыў марскім шляхам. Таму зараз праца і ідзе ў порце Латакіі. Да гэтага нашу гуманітарку дастаўлялі бартамі Іл-76. Рашэнне аб арганізацыі чарговай народнай дапамогі прыняў Прэзідэнт Аляксандр Лукашэнка.
У няпростую паездку адправілася і наша здымачная група. У сілу аб'ектыўных акалічнасцяў ёсць некаторыя цяжкасці з перадачай звестак, але прапусціць такую важную падзею мы не маглі. Юрыю Шаўчуку прыйшлося ў прамым сэнсе слова стаць "мабільным" карэспандэнтам (відэа).
Аляксандр Панамароў, Надзвычайны і Паўнамоцны Пасол Рэспублікі Беларусь у Сірыйскай Арабскай Рэспубліцы: "Наш прынцып па размеркаванні дапамогі заснаваны на прамым узаемадзеянні з урадам, губернатарамі. Таму прысутнасць тут спадара губернатара - гэта сведчанне таго, што ў нас прамыя кантакты, мы аддаем перавагу працы без пасрэднікаў. І напроста рэцыпіентам дапамогі ў нас запланаваная праграма наведвання прытулкаў, дзіцячых дамоў, лагераў бежанцаў. І ў найбліжэйшы час мы плануем заняцца гэтымі праграмамі, каб непасрэдна самыя бедныя слаі атрымалі гэтую дапамогу і маглі ёю скарыстацца".
Дзякуй, Юра. Чакаем твайго вяртання. Спадзяюся, ты з намі падзелішся ўсімі падрабязнасцямі сваёй камандзіроўкі і распавядзеш аб усім у сваім спецыяльным рэпартажы "Дарога жыцця" ўжо ў гэты чацвер.
