Беларускі прадэманстравалі ўборы, у якіх прадставяць краіну на конкурсах прыгажосці

На подыуме Нацыянальнай школы прыгажосці прайшлі Анастасія Лаўранчук - сёлета дзяўчына адправіцца на "Міс свету" ў Лондан, а таксама Караліна Барысевіч: як стала вядома сёння, яна прадставіць Беларусь на "Міс Супранейшнл" у Польшчы. Дзяўчыны прэзентавалі сукенкі для вячэрняга выхаду, эскіз убору для фінальнага гала-канцэрта і нацыянальны касцюм.  Вобраз Анастасіі Лаўранчук багаты нацыянальнымі сімваламі: на сцэну конкурсу "Міс свету" дзяўчына выйдзе ў камплекце з традыцыйнай белай кашулі з элементамі вышыўкі, камізэлькі і спадніцы. Апошнюю ўпрыгожваюць больш за 160 стразаў: гэта ручная работа беларускіх дызайнераў. У гэтым уборы Анастасія станцуе лявоніху з трашчоткамі. Вобраз дапоўніць і галаўны ўбор з беларускіх кветак. 

Дарэчы, за ўдалы вобраз удзельніцам конкурсаў прыгажосці налічаюцца дадатковыя балы.