БелДІМ акрэдытаваны на выдачу сертыфікатаў на экапрадукцыю

Атрымаць сертыфікат на арганічную прадукцыю зараз можна ў Беларускім дзяржаўным інстытуце метралогіі. Пасля праходжання адпаведных выпрабаванняў і ацэнкі вытворца атрымае адпаведны дакумент і права маркіраваць свой тавар спецыяльным знакам "Арганічны прадукт". У гэтую катэгорыю трапляе прадукцыя харчовай прамысловасці, а таксама сельскай гаспадаркі, у тым ліку і аквакультур, вырашчаная без хімікатаў, сродкаў абароны, рэгулятараў росту і ГМА.

Валерый Гурэвіч, дырэктар Беларускага дзяржаўнага інстытута метралогіі: "Будзе праводзіцца праца, якая звязана з правядзеннем выпрабаванняў, плюс ацэнка ўмоў стварэння гэтай прадукцыі, яе паходжанне, каб пацвердзіць, што яна вырасла ў натуральных умовах або яна была вырашчана ва ўмовах натуральнага асяроддзя. Па выніках экапрадукцыя атрымлівае адпаведны сертыфікат, на падставе якога спажывец зможа пераканацца, што гэта прадукцыя арганічнай вытворчасці".

Таццяна Філанчук, намеснік начальніка аддзела Беларускага дзяржаўнага інстытута метралогіі: "У нашай лабараторыі распрацаваны сучасныя аналітычныя метады інструментальнага кантролю, якія дазваляюць прааналізаваць 300 найменняў пестыцыдаў з адной пробападрыхтоўкі ў вельмі кароткі перыяд часу. Час аналізу не перавышае 15-20 хвілін для расліннай прадукцыі і для прадукцыі жывёльнага паходжання гэты час павялічваецца да 8-10 гадзін".

Атрыманне сертыфіката - добраахвотнае права вытворцы. Дакумент будзе выдавацца тэрмінам на 5 гадоў. Пры гэтым штогод патрэбна яго пацвярджаць. Кошт дакумента, адзначаюць у БелДІМ, будзе значна ніжэйшым, чым у іншых краінах. Дарэчы, над сертыфікацыяй сваёй прадукцыі ўжо працуе Дзяржынскі агракамбінат.