Беларусь заняла 58 месца ў рэйтынгу сацыяльнага развіцця

22 Ліпеня 2014
Усяго 132 краіны і больш чым 50 паказчыкаў, у якіх можна вылучыць тры асноўныя групы: дабрабыт, патрэбнасці і развіццё чалавека. У нашай краіне міжнародныя эксперты асабліва адзначылі вынікі ў сферы харчавання, доступу да неабходнай меддапамогі і даступнасці базавай адукацыі. Каментарыі экспертаў у рэпартажы Лізаветы Казаковай.



Індэкс сацыяльнага развіцця - гэта камбінаваны паказчык, які вымярае ўзровень грамадскага дабрабыту і сацыяльнага прагрэсу ў краінах свету. Распрацаваны ён быў летась пад кіраўніцтвам Майкла Портэра, прафесара Гарвардскага ўніверсітэта, спецыяліста ў галіне стратэгічнага кіравання і міжнароднай канкурэнтаздольнасці. Рэйтынг складаюць прадстаўнікі шэрагу ўніверсітэтаў і даследчых цэнтраў свету на аснове апытанняў, ацэнак экспертаў, статыстычнай інфармацыі. Па выніках вывучэння звыш 50 паказчыкаў Беларусь выйшла на 58 месца са 132 краін і абагнала Расію, Украіну і іншыя краіны СНД.
Ганна Яшчук, эксперт у галіне сацыяльнай палітыкі: Індэкс сацыяльнага развіцця - гэта, вядома, комплексны паказчык. Але яго адрозненне ад іншых немалаважных паказчыкаў у тым, што ён не ўлічвае эканамічны складальнік. Г. зн. наш з вамі ўзровень дабрабыту, узровень развіцця, узровень даступнасці сацыяльных паслуг. І, вядома, вельмі важна тое, што гэта сапраўды для нас маленькая перамога, таму што для невялікай Рэспублікі Беларусь займаць 58 месца - гэта ганарова.
Што датычыцца асноўных паказчыкаў, улічваюцца доступ да харчавання і вады, да электрычнасці і санітарных паслуг, нарэшце, доступ да медыцынскай дапамогі. Па гэтых параметрах Беларусь заслужыла найбольш высокую ацэнку экспертаў.
Алена Богдан, начальнік галоўнага ўпраўлення арганізацыі медыцынскай дапамогі Міністэрства аховы здароўя Беларусі: Рэспубліка Беларусь у многіх рэйтынгах, якія звязаны з аказаннем медыцынскай дапамогі або маюць кампаненты аказанне меддапамогі ў падліку дадзенага рэйтынгу, знаходзіцца на лідзіруючых месцах. Я павінна сказаць, што наша краіна адзіная сярод усіх краін ААН, якая змагла даказаць дакладнасць сваіх паказчыкаў дзіцячай смяротнасці. У нас быў эксперт са штаб-кватэры ААН з Нью-Ёрка, матэматык, які разлічвае матэматычным шляхам узровень дзіцячай смяротнасці ў краіне.
Яшчэ адзін яркі паказчык: паводле звестак Сусветнай арганізацыі аховы здароўя, 100-працэнтны ўзровень пісьменнасці да 2012 года дасягнулі толькі 14 краін планеты. Сярод іх Беларусь, краіны Балтыі, Польшча, Расія, Грузія, Казахстан.
Як сярэднія эксперты ацанілі жыллёвыя ўмовы, доступ да інфармацыі і сродкаў камунікацыі, нашу экалогію. Словам, ёсць над чым працаваць, і работа вядзецца.
Юрый Салаўёў, кіраўнік грамадскага аб'яднання Экалагічная ініцыятыва: З пункту погляду гэтага рэйтынгу наша краіна па экалогіі займае пасярэдняе месца. Я б адзначыў, што па многіх параметрах, у прыватнасці, па наяўнасці водных рэсурсаў, па пакрыцці ляснымі насаджэннямі, па якасці таго ж самага атмасфернага паветра мы знаходзімся на адным з першых месцаў у Еўропе. Вядома, калі параўноўваць з заканадаўцамі моды ў гэтым рэйтынгу - з такімі, як Новая Зеландыя, Швейцарыя, нам ёсць яшчэ над чым працаваць. Я бы хацеў яшчэ адзначыць, што ёсць два асноўныя фактары, якія значна ўскладняюць нам сітуацыю. У першую чаргу, гэта тое, што наша краіна пацярпела ад аварыі на ЧАЭС.
У цэлым жа Беларусь дэманструе найлепшыя паказчыкі сацыяльнага развіцця сярод краін СНД. Гэта нязменна адзначаюць многія міжнародныя эксперты.
Ганс Кехлер, доктар эканомікі, прафесар Інсбрукскага ўніверсітэта, Аўстрыя: Беларусь - гэта цэнтр інвестыцыйных распрацовак і навуковых даследаванняў. Менавіта таму я заяўляю адказна: у Беларусі дастаткова кваліфікаваных спецыялістаў для мадэрнізацыі. Плюс ваша краіна валодае індустрыяльнымі магутнасцямі. Гэта вылучае вас у рэгіёне сярод тых, хто страціў нацыянальную прамысловасць. Гэта ж дазваляе Беларусі дзейнічаць як паўнавартасная незалежная дзяржава. Ваша высокая пазіцыя ў свеце - гэта заслуга саміх беларусаў.


Рыкарда Джучы, кіруючы дырэктар Berlin Economics, Германія: Высокую ацэнку нязменна атрымліваюць кваліфікацыя і здольнасці вашых людзей з пункту погляду рынку працы. Вы стабільна пашыраеце геаграфію вашага экспарту, здымаючы бар'еры і межы ўнутры саюза. Таму з пункту погляду эканамічнай палітыкі пры ўсіх рызыках для вашай невялікай краіны гэта надзвычай важныя кірункі росту і развіцця.
Рэйтынг сацыяльнага развіцця дазваляе параўнаць краіны па розных параметрах, даведацца асноўныя паказчыкі і ацаніць перспектывы далейшага развіцця. Годнае месца Беларусі ў рэйтынгу гаворыць само за сябе.