Беларусь у аб'ектыве ўвагі аднаго з найбуйнейшых медыяхолдынгаў свету. Тэлеканал "Дыскаверы" прэзентуе кінапраект аб нашай краіне. Прадметам творчага натхнення і вывучэння стала Белавежская пушча. Яе завуць лёгкімі Еўропы. Усё лета здымачная група "Энімал Плэнет" і "Дыскаверы" даследавала Нацыянальны парк, спрабуючы зафіксаваць непаўторныя краявіды і занесеную ў Чырвоную кнігу флору і фаўну. Хутка фільм убачыць свет у адным з найпапулярнейшых эфіраў свету, а напярэдадні стужку прэзентавалі ў Мінску. Больш падрабязна раскажа Наталля Бардзілоўская.
Сусветная прэм'ера кінапраекта "Белавежская пушча. Першародны лес" у эфіры тэлеканала "Энімал Плэнет" ("Дыскаверы") адбудзецца 27 верасня. І з гэтага ж дня па ўсёй Беларусі стартуе вялікая акцыя для школьнікаў. Ва ўсіх абласных цэнтрах адбудзецца паказ фільма, фотавыставы і флэшмобы пад назвай "Парад зубраў".
Гэты імправізацыйны арт-жарт з размалёўваннем зубраў прыдумалі ў самой Белавежскай пушчы. Скульптуры ў натуральную велічыню будуць вазіць па розных гарадах і запрашаць юных мастакоў да творчасці. Адзін з нацыянальных сімвалаў і брэнд - зубр - і дзіцячыя надпісы на велічэзных цацках "Мая Беларусь" - для ўдзельнікаў прэм'ернага кінапаказу ў Палацы Рэспублікі. Апынулася, што зубр, як і падворлік белы, і воўк, і кажан - той рэдкі прадстаўнік фаўны, якога нідзе, акрамя як у Белавежскай пушчы сустрэць нельга. Здымачная група "Энімал Плэнет" не магла абысці ўвагай беларускія прыродныя багацці. 45-хвілінны фільм зараз увойдзе ў сусветную навуковую тэлеэнцыклапедыю. Стваральнікі пастараліся ўмясціць у яго больш чым паўтары тысячы гектараў запаведніка і самую вялікую ў Еўропе колькасць відаў раслін і жывёлін.
Прыгажосць беларускай пушчы глядач убачыць вачамі траіх аператараў, якія на тры летнія месяцы пасяліліся ў Белавежжы і разам з правадырамі і навукоўцамі прайшлі самымі патаемнымі сцежкамі. Тэхналогіі здымачнага рэжыму госці максімальна падпарадкавалі захаванню экалагічнай раўнавагі. Дзеля рэдкага кадра - шматдзённыя пешыя маршруты і шматгадзінныя тэлезасады на звышасцярожных насельнікаў пушчы. За іх непасрэднасцю і чароўнасцю стваральнікам атрымалася ўбачыць і перадаць гледачу не толькі прыродныя багацці, але і беражлівае стаўленне беларусаў да іх.
Фільм аб Белавежскай пушчы - не апошні праект "Энімал Плэнет" у Беларусі. "Дыскаверы" хацеў бы ўбачыць і захаваць прыродны запаведнік у розныя поры года.
