Грамадзяне з 82 краін зараз могуць абсалютна свабодна прыляцець да нас, не затрачваючы ні часу, ні грошай для афармлення адзнакі ў пашпарце. Спецыялісты ўжо пачалі падлічваць эканамічны эфект ад такога новаўвядзення, але пра поспех пакуль гаварыць рана. Праўда, новая мера ўжо спадабалася нашым суседзям па кантыненце, але самае галоўнае, паводле слоў тураператараў, госці з ЗША і нават Аўстраліі зараз больш ахвотна едуць да нас. Што можна ўбачыць у Беларусі за 5 дзён, якому адпачынку аддаюць перавагу ў нас замежныя госці - у рэпартажы Таццяны Кароль.
Без малога два месяцы па новых правілах гэты нацыянальны тураператар дапамагае іншаземцам адкрыць для сябе Беларусь. Фактычна джэнтльменскі набор нашых славутасцяў: Нясвіжскі, Мірскі замкі, аглядная экскурсія па Мінску, Хатынь і Курган Славы - такі маршрут можна прайсці за 4 дні. Прычым, не чакаючы збору поўнай групы. Для госця правядуць экскурсіі нават індывідуальна.
Крыстафер Візі ў Беларусі не першы раз, але без адзнакі ў пашпарце прыехаў упершыню. І ўпершыню вырашыў пазнаёміцца з гістарычнымі месцамі нашай баявой славы. Гаворыць, што такая свабода - прыемны сюрпрыз, які ўзмацняе цікавасць да краіны, і не толькі турыстычную. Большасць бізнесменаў зараз больш ахвотна прыязджаюць да нас з планамі наладжваць сваю справу ў Мінску.
Крыстафер Візі, турыст, Вялікабрытанія: "У вас ёсць што паглядзець, але яшчэ ёсць і куды інвеставаць. Бязвізавым рэжымам дзяржава гаворыць пра сябе, як пра адкрытага партнёра".
Сапраўды, Мінспорта пакуль гаворыць аб адмене віз як аб іміджавым эфекце, але з мэтай прыцягнуць інвестараў. Аб канкрэтных лічбах гаварыць рана, але пасажырапаток да нас праз нацыянальны аэрапорт за такі кароткі тэрмін павялічыўся на 30 %. Калі такі адкрыты рэжым зарэкамендуе сябе, у планах павялічыць тэрміны бязвізавага знаходжання іншаземцаў у Беларусі.
Віталь Грыцэвіч, намеснік дырэктара Дэпартамента па турызме Міністэрства спорту і турызму Беларусі: "Мы разумеем, што такі від турызму як санаторна-курортны, які ў нас вельмі моцна развіты, гэты перспектыўны кірунак. У гэтым плане хацелася б, каб пасля апрабацыі менавіта пяцідзённага бязвізавага рэжыму мы маглі бы перайсці да павелічэння тэрмінаў і разгляду пытанняў аб павелічэнні знаходжання замежных грамадзян без візы ад 14 дзён".
Здавалася б, адкрываючы межы, краіна страчвае частку сродкаў, не спаганяючы плату за візу і турыстычны збор, але калі раней па адпачынак да нас прыязджалі парамі або паасобку, то зараз бяруць з сабою сяброў - па 5-6 чалавек у групе. А гэта дадатковыя месцы ў гасцініцах, знаёмства з нацыянальнай кухняй і, вядома, наведванне нашых культурных аб'ектаў. Эканамічны эфект сапраўды падлічыць няпроста, але ён відавочны.
Беларусь без візы ўжо наведалі каля 6 з паловай тысяч чалавек з 62 краін. Лідары тут госці з Германіі, Польшчы, Францыі і Італіі. Турысты прыемна здзіўлены беларускімі цэнамі. Чатырохдзённы тур на чалавека з пражываннем у гасцініцы, трохразовым харчаваннем і экскурсіямі ад нацыянальнага тураператара будзе каштаваць 250 еўра. Гэта значна ніжэй, чым аналагічны тур у гэтых краінах, а самае важнае - ніякай дадатковай платы.
З адменай віз нацыянальныя турфірмы прапануюць іншаземцам не толькі культурны шок. За 3-4 дні ў беларускіх здраўніцах можна прайсці поўную дыягностыку і адпачыць у спа. Іншымі словамі, Беларусь - універсальны курорт. Знаходзячыся ў самым цэнтры Еўропы, яна пераняла лепшыя турыстычныя традыцыі суседзяў. І сёння, калі трапіць у нашу краіну як мінімум на 5 дзён не выклікае асаблівай цяжкасці, можна перафразаваць вядомае - "усе дарогі вядуць…. не толькі ў Рым".
