Ён праходзіць пад патранажам Прэзідэнта Беларусі. Больш за 500 удзельнікаў з розных галін навукі, культуры, адукацыі некалькі дзён разам будуць шукаць шляхі рашэння праблем і задаваць імпульс для рэалізацыі новых праектаў.
Алена Борматава - аб першым дні форуму.
Нацыянальная бібліятэка Беларусі аб'яднала інтэлектуальную эліту краін СНД. Штогадовае мерапрыемства па гуманітарным супрацоўніцтве ўжо прымалі ў Казахстане, Таджыкістане. Двойчы з'езд інтэлектуалаў праходзіў у Расіі. Беларусь упершыню стала пляцоўкай для стварэння новых праектаў у гуманітарнай сферы. Прывітанне ўдзельнікам форуму накіраваў Прэзідэнт нашай краіны - мерапрыемства праходзіць пад яго патранажам.
Аляксандр Радзькоў, першы намеснік кіраўніка Адміністрацыі Прэзідэнта Рэспублікі Беларусь: Форум стаў значным фактарам развіцця міждзяржаўных адносін у гуманітарнай сферы. Сустрэчы дзеячаў навукі, культуры, адукацыі краін СНД спрыяюць умацаванню братэрскага адзінства нашых народаў.
Форум праходзіць у рамках старшынства Беларусі ў Садружнасці Незалежных Дзяржаў. Асноўная тэма восьмага форуму - экалогія. Беларусь мае вялізны вопыт удалага пераадолення наступстваў экалагічнай катастрофы, звязанай з аварыяй на Чарнобыльскай АЭС. І гэтым вопытам краіна гатовая дзяліцца са сваімі суседзямі і партнёрамі.
Аляксандр Торшын, першы намеснік Старшыні Савета Федэрацыі Федэральнага сходу Расійскай Федэрацыі: Ніякі Інтэрнэт, ніякія Твітары, у якіх я, напрыклад, таксама ўдзельнічаю, не замяняюць жывых зносін, не замяняюць спазнання на свае вочы. І для гэтага інтэлігенцыя збіраецца ўжо 8-ы раз, і гэтым разам на гасціннай беларускай зямлі.
Каля 500 інтэлектуалаў - рэктары вядучых універсітэтаў, прафесары медыцыны, эксперты, вядомыя людзі культуры, мастацтва, спорту, журналісты паднімаюць на форуме тэмы не толькі экалагічнай культуры. Навуковую інтэлігенцыю хвалююць і пытанні адукацыі, медыцыны, турызму. Бо наступны год у СНД аб'яўлены Годам турызму.
Ад лячэння дзіцячых анкалагічных захворванняў і захавання культурнай спадчыны да інтэграцыйных працэсаў маладзёжнай палітыкі краін СНД. Шматвектарнасць навукова-культурнага дыялогу праходзіць не толькі ў рамках пленарнага пасяджэння, але і ў фармаце тэматычных секцый.
І ўжо да вечара з'явіліся першыя вынікі форуму. Вырашана звярнуцца да Выканаўчага камітэта СНД з просьбай аб аднаўленні дзейнасці Савета па экалогіі на прасторы Садружнасці і падтрымліваць міжнародныя праекты ў галіне захавання культурнай і прыроднай спадчыны краін СНД.
Міхаіл Швыдкой, спецыяльны прадстаўнік Прэзідэнта Расійскай Федэрацыі па міжнародным і культурным супрацоўніцтве: Адна з важных ініцыятыў, якая нарадзілася менавіта на форуме, - гэта ініцыятыва рэктара МДУ Віктара Антонавіча Садоўнічага, які прапанаваў арганізаваць інтэлектуальны клуб.
Заўтра форум працягне сваю працу. Але ўжо вядома, што з ініцыятывай аб правядзенні 9-га з'езду інтэлігенцыі выступіла Украіна, якая ў наступным годзе будзе старшынстваваць у СНД.
