Беларусь прымае дзяцей з Кітая

25 Жніўня 2018

Больш за паўсотню школьнікаў адпачываюць і аздараўляюцца ў нацыянальным цэнтры "Ждановічы". Тут для іх падрыхтаваны не толькі культурныя і спартыўныя мерапрыемствы - спецыяльна для гасцей адкрылі новыя корты тэніса, міні-футбола, баскетбола, але і комплекснае медыцынскае абследаванне. Спелеатэрапія, масаж, водалячэнне. Дзеці ўжо паспелі ўбачыць беларускую сталіцу і ахвотна дзеляцца ўражаннямі - рэпартаж Юліі Токар.

Пад запальныя беларускія матывы яны танцуюць польку, прысюды і проста водзяць карагоды - сардэчны прыём на беразе Мінскага мора невыпадковы - у "Ждановічах" інтэрнацыянальныя канікулы. Больш за паўсотні школьнікаў з паўднёвых раёнаў азіяцкай краіны прыехалі на адпачынак і аздараўленне.

Спецыяльна да прыезду гасцей адкрылі і новыя спартыўныя корты - тэніс, міні-футбол, баскетбол. Прафесійныя пляцоўкі ўжо паспелі ацаніць і юныя спартсмены. 14-гадовы Ян Дзею на сваёй радзіме пасля ўрокаў заўсёды гуляе ў баскетбол.

А тут прапаноўваюць пабыць мастаком і авалодаць дэкаратыўна-прыкладным майстэрствам.

Жыхары мегаполісаў на час змянілі шумныя гарады на адпачынак у духмяным беларускім лесе. Тут, акрамя прыроднага рэлаксу, шырокая аздараўленчая праграма. Спелеётэрапія, масаж.

Пазнаёміцца з традыцыямі і пакаштаваць Беларусь на смак - праз фуд-турызм. У меню ніякай азіяцкай кухні - выключна дранікі, клёцкі і боршч. Пажаданні саміх кітайцаў.

Конкурсы, канцэрты, экскурсіі. Адкрываць Беларусь юныя турысты з Кітая могуць з розных ракурсаў. Дарэчы, сёлета ў Мінскую вобласць на аздараўленне прыехалі каля паўтысячы дзяцей з Расіі, Кітая, Японіі, Сірыі. Яны абавязкова ў сваіх школьных лістах падзеляцца бязмежнымі ўражаннямі ад новых адкрыццяў і шчырых сяброў.