Такая задача стаіць перад краінай на найбліжэйшыя 10 гадоў. Дарэчы, задача няпростая, бо небяспечнае абсталяванне ў савецкія гады тонамі назапашвалася на прамысловых прадпрыемствах. Паўстагоддзя таму такая тэхніка лічылася панацэяй ад многіх праблем і абяцала краіне пераўзбраенне і тэхнічны прарыў. Сёння ж экалагічная сітуацыя ў свеце дыктуе пераход на зялёныя тэхналогіі і адмову ад хімічна небяспечных рэчываў. Ці рэальна гэта зрабіць у нашай краіне і галоўнае як - каля 80 эколагаў і прадстаўнікоў міжнародных грамадскіх арганізацый абмяркоўвалі ў Гомелі. Падрабязнасці тэмы ў Ганны Кавалёвай.
У Еўропе будуць абясшкоджаны 22,5 тоны хімічных адходаў Беларусі.
На тэрыторыі гэтага прадпрыемства ў Рэчыцкім раёне захоўваецца больш за 40 з выгляду звычайных металічных скрынь. Насамрэч усё гэта - небяспечная спадчына савецкіх часоў. Старыя кандэнсатары і трансфарматары. У іх утрымліваюцца таксічныя і канцэрагенныя рэчывы, небяспечныя для экалогіі і здароўя чалавека
Вось такія адходы зараз захоўваюць больш за 700 прадпрыемстваў краіны. Агульная вага небяспечнага грузу - каля 4 тысяч тон. У Беларусі пакуль такія адходы нідзе не абясшкоджваюць. Займаюцца гэтым толькі ў Еўропе.
Праўда, вывезці іх туды самастойна беларускія прадпрыемствы часцей за ўсё не могуць. Еўрапейскія стандарты па транспарціроўцы хімічных грузаў неймаверна высокія, таму дагэтуль не заставалася нічога, акрамя як назапашваць устойлівыя арганічныя забруджвальнікі. З мёртвага пункта сітуацыю зрушыў новы для краіны экалагічны праект. Яго мэта - прыкладна за год вывезці з Беларусі і абясшкодзіць 22,5 тоны небяспечных адходаў.
Пётр Сачек, каардынатар экалагічнага праекта: "У Рэспубліцы Беларусь няма магутнасцяў для знішчэння такога класа адходаў, і таму для Беларусі гэта экалагічная праблема, якую прапанавала вырашыць грамадскае аб'яднанне "Экалагічная ініцыятыва" і на вырашэнне якой Еўрапейскі саюз выдзеліў каля 100 тысяч еўра".
Праект пачалі рэалізоўваць з Гомельскай вобласці не проста так. Рэгіён сярод лідараў па запасах шкодных адходаў. Пры гэтым адзін з самых насычаных прамысловымі прадпрыемствамі. Дарэчы, менавіта ў гэтым рэгіёне плануюць пабудаваць уласны аб'ект па абясшкоджванні адходаў.
Андрэй Пінігін на вырашэнне гэтай праблемы патраціў 12 гадоў жыцця. У пошуках замежнага вопыту і тэхналогій абясшкоджвання, якія можна было б прывезці ў Беларусь, аб'ездзіў усе кантыненты.
Адмовіцца ад састарэлага канцэрагеннага і таксічнага абсталявання Беларусь абавязана згодна са Стакгольмскай канвенцыяй, якую разам з ёй падпісаў практычна ўвесь свет. Поўнасцю свабоднай ад небяспечных адходаў наша краіна стане да 2028 года.