Жыццёва важны апарат, які падтрымлівае работу сэрца малых пасля складаных аперацый, зараз даступны і беларусам. Дзякуючы яму, ужо атрымалася выратаваць жыццё двухгадовага дзіцяці, якое нарадзілася з рэдкім парокам сэрца і ўжо перажыло тры аперацыі. Умяшанні рознай складанасці праходзяць у РНПЦ дзіцячай хірургіі штодня. З маленькім беларусам, які атрымаў шанец на новае жыццё, пазнаёмілася Юлія Грызунт.
Ілья - чацвёртае дзіця ў сям'і Вольгі Лазеркі. І першы - хлопчык. Той факт, што яшчэ да нараджэння яму паставілі дыягназ - рэдкі і вельмі цяжкі парок сэрца - не збянтэжыў маму, у жываце ў якой быў доўгачаканы сын. Праўда адразу пасля нараджэння яму давялося паехаць не дахаты, а ў бальніцу. Першая аперацыя ў паўтара месяца. Гэтае ўмяшанне было толькі падрыхтоўкай арганізма да наступнага. І яно прайшло паспяхова. Але для арганізма было занадта цяжкім узрушэннем.
Аляксандр Башкевіч, урач-кардыёхірург РНПЦ дзіцячай хірургіі: "На гэтым фоне пагаршэння стану дзіця пераводзіцца ў рэанімацыю, атрымлівае лячэнне адпаведнае і ў дзіцяці развіваецца сур'ёзны вірус, які часцей за ўсё пасля такіх кардыёхірургічных умяшанняў складаных значна абцяжарвае стан дзіцяці аж да яго гібелі".
Інакш кажучы, швы ад мінулай аперацыі разышліся. Маленькае сэрца зноў пад пагрозай, ну а аслабеламу арганізму прыйшлося змагацца з вірусам. Адзіны выхад - паўторная аперацыя. Раней пры такіх акалічнасцях дзеці не выжывалі. Але гэты малы, нягледзячы на тое, што яму яшчэ не было двух гадоў, апынуўся мацнейшы за смерць.
Вольга Лазерка, мама Ільі: "І ён месяц праляжаў у рэанімацыі, потым яго перавялі ў палату - і вось ён пайшоў на папраўку".
Акрамя прафесіяналізму нашых дактароў і сілы духу Ільі быў трэці складальнік - высокатэхналагічнае абсталяванне. Напярэдадні аперацыі ў медыцынскім цэнтры з'явілася машына, якая фактычна працавала замест аслабелага арганізма малога.
Гэты апарат з'явіўся тут два месяцы назад, ён падтрымлівае сардэчную дзейнасць малых пасля складаных аперацый. Акрамя таго, выконвае функцыю лёгкіх. Помпа дапамагае сэрцу перапампоўваць кроў. Ён можа працаваць па некалькі тыдняў без прыпынку.
У міжнароднай практыцы былі выпадкі, калі абсталяванне падтрымлівала жыццё да 200 дзён запар. Дактары ўпэўненыя, што ў будучыні яно выратуе яшчэ не адно жыццё беларускіх малых. Мы паспрабавалі высветліць, хто самы маленькі пацыент РНПЦ дзіцячай хірургіі. Але такую лічбу назваць практычна немагчыма – незалежна ад таго 800 грамаў важыць нованароджаны або 4 кг - калі аперацыя патрэбна, яе зробяць. Нават на самым маленечкім сэрцы.
Канстанцін Драздоўскі, дырэктар РНПЦ дзіцячай хірургіі: "У нас дзве аперацыйныя, рэанімацыя ў нашым цэнтры на 20 ложкаў, там практычна пастаянна яна запоўненая. Таму што дзяцей з парокам сэрца шмат. У 80% - гэта нованароджаныя дзеці знаходзяцца ў рэанімацыі. Мы робім 3-4 аперацыі на дзень".
За год атрымліваецца больш за тысячу карэкцый прыроджаных парокаў сэрца. І зусім хутка такія аперацыі стануць яшчэ больш эфектыўнымі. Для іх пачнуць выкарыстоўваць 3Д мадэлі маленькіх сэрцаў. Якія ў гэтым цэнтры спыняюцца толькі для таго, каб забіцца зноў.
