Беларусь сустрэла 2019! Па добрай традыцыі за некалькі хвілін да бою курантаў да народа нашай краіны звярнуўся Прэзідэнт Аляксандр Лукашэнка.
Кіраўнік дзяржавы зрабіў акцэнт на тым, што Новы год - цёплае сямейнае свята, якое сагравае і радуе сэрцы, аб'ядноўвае нас у самых лепшых пачуццях і чаканнях. І гэты найважнейшы і лепшы час, каб надаць увагу сваім блізкім. Асабліва дзецям. Да якіх асобная просьба: не забываць, што ў іх ёсць бацькі, бабулі, дзядулі, проста правесці час разам і падарыць тым самым нямала шчаслівых хвілін.
Прэзідэнт Аляксандр Лукашэнка: "Разам з намі ў гэты святочны час наша будучыня - моладзь. Тое, якой мы ўбачым Беларусь заўтра, залежыць ад кожнага з вас. Гэта вы павінны захаваць і прымножыць створанае. Сёння краіне асабліва патрэбныя вашы інтэлект і энергія.
Памятайце: ніхто, ніколі і нідзе не будзе любіць і берагчы вас так, як дома.
Але асаблівую цеплыню сваіх слоў я накіроўваю вам, працаўнікам палёў і заводаў, нашай інтэлігенцыі, абаронцам Айчыны, старэйшаму пакаленню і старым. Усім, хто стварыў на багатай беларускай зямлі першую суверэнную і незалежную дзяржаву, працягвае ствараць яе сучаснасць. Мы павінны ўмацаваць сваю дзяржаўнасць на прынцыпах сумленнасці і справядлівасці, і менавіта такой захаваць краіну для дзяцей і ўнукаў.
Адыходзячы год дапамог нам асабліва прачуць сувязь з роднай зямлёй.
Ён стаў першым у трылогіі малой радзімы. Нагадаў, дзе тыя крыніцы, якія сілкуюць нас сілай і энергіяй.
Вярнуў да вытокаў. Туды, дзе па-асабліваму б'ецца сэрца, дзе ўспамінаецца самае патаемнае.
Мы аб'ядналіся ў імкненні зрабіць кожны куток Беларусі не проста прыгожым, а ўзорным.
І ў надыходзячым годзе нам трэба зрабіць усё, каб краіна танула ў зеляніне і кветках, натхняла на творчасць і тварэнне, каб нам заўсёды хацелася вярнуцца дадому.
Я не магу абысці ўвагай тых, хто зараз на пасту, - захавальнікаў нашых жыццяў, людзей, якія гарантуюць ваенную і эканамічную бяспеку Беларусі. Вялікі вам дзякуй за службу і адданасць справе!
Сыходзіць 2018 год. Для кожнага з нас ён склаўся па-рознаму. Мы гублялі родных і блізкіх, знаходзілі новых сяброў, нараджалі і гадавалі дзяцей. Усё, як звычайна ў жыцці. Але галоўнае - мы захавалі мірнае неба для беларусаў, і ў вачах нашых дзяцей няма страху і безвыходнасці ад вайны. Давайце ўсе разам берагчы гэтую найвялікшую каштоўнасць".
Аляксандр Лукашэнка асабліва адзначыў важнасць года надыходзячага. Бо гэта год 75-годдзя вызвалення Беларусі ад нямецка-фашысцкіх захопнікаў, 25-годдзя асноўнага закона Беларусі і год II Еўрапейскіх гульняў. Несумнеўна, гэта будзе час цяжкай працы, перамог і паражэнняў. Але разам мы здольныя зрабіць немагчымае. І якім будзе новы, 2019, залежыць ад кожнага з нас!