Пешаход на дзень! Акцыяй "Дзень без аўтамабіля" завяршаецца сёння еўрапейскі тыдзень мабільнасці, да якога сёлета далучылася больш за 60 населеных пунктаў Беларусі. Традыцыйна ў гэты дзень вадзіцелі і аўтаўладальнікі атрымліваюць права бясплатна скарыстацца грамадскім транспартам пры прад'яўленні вадзіцельскага пасведчання і тэхпашпарта. У цэнтры горада запланаваны розныя мерапрыемствы для ахвотнікаў далучыцца да падзеі.
Анастасія Янчэўская, дырэктар Мінскай веласіпеднай супольнасці: "У 2 гадзіны дня ўсіх вас чакаем па вуліцы Леніна. Прыязджайце са сваімі веласіпедамі і паўдзельнічайце ў конкурсах, пакажыце спрытнасць язды і разгадайце каверзныя пытанні па правілах дарожнага руху і атрымайце прызы. У 6 гадзін мы чакаем вас на пляцоўцы веласіпеднай супольнасці. Будуць паказаныя кароткаметражкі аб развіцці веласіпеднага руху ў свеце. У 9 гадзін мы чакаем вас на заездзе па праспекце Незалежнасці. Прыязджайце з пярэднім і заднім святлом, падрыхтаваныя, бярыце дзяцей і сяброў. З 9 гадзін мы едзем па праспекце Незалежнасці ў бок Нацыянальнай бібліятэкі".
У рамках вячэрняга маляўнічага заезду "Веласіпедыст, дай агню" будзе праведзены конкурс на афармленне самага яркага ў плане светлавых рашэнняў веласіпеда. Акцыя завершыцца канцэртам пад адкрытым небам.
