Сёння Беларусь успамінае страшную трагедыю часоў Вялікай Айчыннай вайны.
Роўна 75 гадоў таму нацысты спалілі Хатынь. Смяротны прысуд мірнаму насельніцтву вынеслі фашысты, якія не пашкадавалі старых, жанчын і немаўлят. У агні загінулі 149 чалавек. У памяць аб ахвярах тых падзей у мемарыяльным комплексе адбыўся мітынг-рэквіем. Да Вечнага агню ўвесь дзень людзі нясуць кветкі. Быў ускладзены вянок і ад Кіраўніка беларускай дзяржавы Аляксандра Лукашэнкі. Кіраўнік Адміністрацыі Прэзідэнта Наталля Качанава зачытала ад імя Прэзідэнта Беларусі зварот да суайчыннікаў з выпадку 75-годдзя Хатынскай трагедыі.
Мы, беларусы, носьбіты геннай памяці нечалавечых пакут народа, які выстаяў у Вялікай Айчыннай вайне, гаворым усім: "Хай журботны перазвон Хатыні гучыць і перасцерагае ад паўтору страшнай трагедыі. Хай іх металічны плач данясецца да тых куткоў Зямлі, дзе сёння забылі аб тым, што жыццё - гэта дар звыш, мір - самая вялікая каштоўнасць. Мы павінны гэта памятаць заўсёды!" - адзначаецца ў звароце.
Падчас мітынгу-рэквіема таксама прагучала Усебеларуская малітва аб міры, у якой прынялі ўдзел кіраўнікі розных канфесій, прадстаўнікі ўлады і грамадскіх аб'яднанняў.
Таксама адбылася цырымонія гашэння спецыяльнага канверта. На ім адлюстравана выява скульптуры "Непакорны", мемарыяльных элементаў "Могілкі вёсак", "Сцяна памяці", абеліскаў са званамі.