8-ы з'езд Федэрацыі прафсаюзаў Беларусі збярэ 508 дэлегатаў

26 Лютага 2020
Адстойваць правы грамадзян і абараняць інтарэсы людзей - галоўная задача і Федэрацыі прафсаюзаў.  Ужо заўтра ў Мінску адкрыецца 8-ы з'езд самай масавай грамадскай арганізацыі краіны. Ён прадоўжыцца два дні. Плануецца, што ў пятніцу да абмеркаванняў далучыцца і беларускі лідар. Сёння за асаблівыя дасягненні ў сацыяльна-эканамічным развіцці, абароне правоў і інтарэсаў працоўных Федэрацыі прафсаюзаў Беларусі  ўказам Прэзідэнта прысуджаны Ганаровы дзяржаўны сцяг Рэспублікі Беларусь. 

Пра парадак дня  форуму распавядзе Анастасія Бенедзісюк

Яны стаяць ля станка, аперацыйнага стала, школьнай дошкі, напэўна, сядзяць за рулём аўтобуса, на якім нейкую гадзіну таму вы, менавіта вы, тэлегледачы, ехалі дахаты. Ды што там. Менавіта вы, напэўна, таксама ў радах прафсаюза. ФПБ сёння - гэта каля 4 мільёнаў чалавек. Абсалютная большасць працоўных. 

Калі дакладна,  96 %. Зрэшты, не будзем гаварыць за ўсю краіну. На тыдні яшчэ будуць падставы падвесці вынікі. Зараз толькі два канкрэтныя прыклады. Гэта Мінскі аўтамабільны завод. 18 гадоў таму сюды на першае рабочае месца Валерый Курсевіч прыйшоў інжынерам па якасці. Усё па Дасце і каб "касцюмчык сядзеў" - ён ацэньваў прадукцыю. Яшчэ паспеў папрацаваць дырэктарам рысорнага завода, адстойваў інтарэсы прамыслоўцаў у парламенце (дэпутат 6-га склікання). І вось  некалькі месяцаў Валерый Курсевіч - старшыня прафкама сталічнага аўтагіганта. 

Працоўны кодэкс, Жыллёвы, Падатковы - усе змяненні абмяркоўваюцца на месцах,  часта менавіта ў такіх цэхах і нараджаецца ідэя.

Просьбы ліцейшчыкаў, кавалёў, зваршчыкаў і маляроў Валерый Курсевіч рыхтуецца агучыць на 8-м з'ездзе Федэрацыі прафсаюзаў. Сімвалічна старонак з прапановамі  таксама 8.

Аб тым, як працуе здаровае сэрца,  хто можа ведаць лепш? Гэта ўжо 4 гарадская клінічная бальніца імя Саўчанкі. Разам з калегамі з РНПЦ "Кардыялогія" тут пастаянна ўкараняюць новыя медыцынскія тэхналогіі ў лячэнне сардэчна-сасудзістых захворванняў. Наогул у чацвёрцы з "сэрцам"  усё ў парадку. 99 % медперсанала - у прафсаюзе. Ды і як інакш, калі галоўны ўрач  з такім прафсаюзным вопытам.

Дэлегатам з'езда прафсаюзаў Вацлаў Янушка будзе ўпершыню. Ганарова, але і адказна. А таму напярэдадні  яшчэ раз пра надзённае з калегамі. Важна нічога не прапусціць. Спрыяльны рэжым працы, стварэнне аптымальных і бяспечных умоў працы, ахова і здароўе работніка. Нават адпачынак кладзецца на плечы прафсаюзаў. Бо і праўда, прыйшоўшы на прыём да ўрача, менш  за ўсё хочацца думаць, што лячыць нас будзе чалавек, у якога галава баліць па іншай падставе. 

Зрэшты, самым актуальным пытаннем для медыкаў, як і настаўнікаў, з пачатку года застаюцца зарплаты. Тэма на пастаянным кантролі і прафсаюзаў.

Словам, тэм для абмеркаванняў шмат. 8-ы з'езд прафсаюзаў Беларусі будзе доўжыцца два дні. Паўтысячы дэлегатаў. Прадстаўлены будзе кожны куток і галіна. Вынікам сустрэчы стане праграма федэрацыі на найбліжэйшую пяцігодку.