Традыцыйна 3 ліпеня - выхадны. Аддаючы даніну памяці гераічнаму подзвігу нашых дзядоў і прадзедаў, якія вызвалялі Мінск 74 гады таму падчас аперацыі "Баграціён", заўтра ля стэлы "Мінск - горад-герой" мы - унукі і праўнукі - пройдзем іх маршрутам. Маючы адбыцца парад войскаў у гонар Дня Незалежнасці, карпатлівая падрыхтоўка да якога доўжыцца вось ужо некалькі месяцаў, абяцае быць адным з самых маштабных і каларытных за ўсю гісторыю суверэннай Беларусі. Паўтарачасовае дзейства - гэта не толькі дэманстрацыя ваеннай моцы нашай краіны, але і шоу міжнароднага ўзроўню. Надзея Сербіненка даведалася аб парадзе ўсё самае цікавае.
3 ліпеня ў Мінску адбудзецца грандыёзнае шоу. Парад войскаў Мінскага гарнізона і спектакль "Мой родны кут" пачнецца ў 10:00.
Агульная працягласць парада - каля трох тысяч метраў! На праспект Машэрава выйдуць пяць тысяч вайскоўцаў, 250 адзінак тэхнікі, а ў паветра паднімуцца амаль паўсотні баявых самалётаў і верталётаў.
Парадная калона дзеліцца на так званыя разлікі - іх яшчэ называюць каробкамі. Чаканіць крок будуць 19 пешых, а ўслед за імі праедуць 23 разлікі ваеннай тэхнікі. На дэманстрацыю сваёй выправы ў кожнага ўдзельніка парада ўсяго 8-10 хвілін.
Гэты парад запомніцца нам некалькімі прэм'ерамі. Упершыню ў калоне - жаночы полк. 175 вайскоўцаў-дзяўчат з усёй краіны. "Кастынг" быў строгім: удзельніц адбіралі не толькі па вонкавым выглядзе, але і па дасягненнях на службе - гонар выпаў лепшым прадстаўніцам сіл спецаперацый, ваенна-паветраных сіл і войскаў СПА.
Таксама ўпершыню ў пешай калоне пройдуць воіны Народна-вызваленчай арміі Кітая. Парадны разлік будзе прадстаўлены атрадам ганаровай варты. У яго складзе - лепшыя прадстаўнікі Узброеных сіл Кітая.
Механізаваная калона - неад'емная частка ваеннага парада. Спачатку пройдзе рэтратэхніка. Узначаліць парадны разлік легендарны савецкі танк - Т-34. Следам пройдзе ваенная тэхніка апошняга пакалення - высокоманеўраныя пазадарожнікі, браняваныя аўтамабілі, сучасныя рабатызаваныя комплексы "Багамол" і "Кентаўр". І, вядома, зенітныя ракетныя комплексы, самаходныя гаўбіцы і сістэмы залпавага агню - самыя ўражлівыя па памерах і мошчы ўзоры тэхнікі.
А ў небе над Мінскам будуць пілатаваць лепшыя лётчыкі авіяцыі ВПС і войскаў СПА. Хуткасць палёту самалётаў можа дасягаць 500 км за гадзіну. А адлегласць паміж суднамі ў небе - усяго 25 метраў. Таму паветраны парад патрабуе ад лётчыкаў выключна высокага прафесіяналізму і дакладнасці.
Адзін з самых відовішчных эпізодаў - пляц-парад. 115 чалавек - эліта войскаў рознага прызначэння - прадэманструюць сінхронныя выразныя і зладжаныя рухі. Сёлета іх набор ускладнілі, а колькасць павялічылі. Каб дабіцца такой відовішчнасці, афіцэры трэніруюцца па 8 гадзін кожны дзень.
Завершыць парад масавае тэатралізаванае шоу "Мой родны кут". У Год малой радзімы больш як 2 сотні гарадоў і вёсак будуць адзначаныя ў тэатралізаваным фрагменце. 3D-эфект флага, які калыхаецца на ветры, створаць 1200 удзельнікаў.
