Аляксандра Драгун пазнаёмілася з самымі працавітымі і дружнымі бацькамі.
Сёлета ў сям'і Мацавілаў багаты ўраджай. Спарадкаваць бульбу і агарод заўсёды дапамагаюць дзеці. А іх у шчаслівых бацькоў чацвёра. Пароўну - дзяўчынак і хлопчыкаў.
У жніўні бацькі са сваімі памочнікамі сталі самай працавітай і дружнай сям'ёй у сталічным рэгіёне. Адразу ў дзвюх намінацыях перамаглі на абласным конкурсе на лепшую сям'ю. Гэта зразумела. Разам не толькі працуюць, але і адпачываюць.
А яшчэ гатуюць. Узялі сабе за традыцыю за кубачкам чаю абмяркоўваць сямейныя навіны. Іх дом стаў родавым маёнткам. Тут жыве трэцяе пакаленне сям'і Мацавілаў. Спачатку - бабуля і бацькі, а затым - дзеці і ўнукі.
Дарэчы, у вёсцы Копцеўшчына і пазнаёміліся шчаслівыя бацькі. З сёмага класа яны пачалі сябраваць. Пасля таварыскія адносіны перараслі ў каханне на ўсё жыццё. Гэта бачна і па шчаслівых вачах дзяцей, і іх выхаванні.
Сям'я Мацавілаў не толькі самая працавітая і дружная, але і музычная. Пакуль трыа складаецца з фартапіяна, цымбалаў і гітары. Але ў сямейны аркестр чакаюць і самага малодшага. Ён пакуль прыслухоўваецца да мілагучных гукаў.
Двое дзяцей вучацца ў Мінску. Каця - будзе праграмістам, а Улад - ваенным. Нават маці атрымлівае другую адукацыю - вучыцца ў Акадэміі Кіравання пры Прэзідэнце. За старэйшую цяпер Сафія. Дзяўчынка дапаможа і па гаспадарцы, і малодшага брата выхоўвае.
Вера Мацавіла заўсёды марыла стаць шматдзетнай маці, а Уладзімір - пра такую жонку і ўдалых дзяцей.
