75 гадоў на службе. 14-ы асобны полк урадавай сувязі сёння святкуе юбілей. Гэта адно з самых закрытых і ў той жа час важных падраздзяленняў краіны, якое забяспечвае бяспечнай тэлефоннай сувяззю вышэйшае кіраўніцтва краіны ў ваенны час. Сярод яго функцый і бесперабойная сувязь - падчас рабочых візітаў Кіраўніка дзяржавы ў рэгіёны краіны. У гісторыі падраздзялення нямала хвалебных старонак - байцы палка не раз праяўлялі сябе на франтах Вялікай Айчыннай, былі і ў Афганістане, дапамагалі наладзіць сувязь у зоне чарнобыльскай аварыі. Сёння на ўзбраенні палка самыя новыя ўзоры лічбавай тэхнікі і абсталявання, а ўсе сістэмы шыфравання спраектаваныя нашымі распрацоўшчыкамі. Аб гісторыі і сучасных рэаліях палка - падрабязней Аляксандр Камовіч.
694 полк, а цяпер 15 АППС КДБ Беларусі, бярэ свой пачатак у 1943 годзе. Падчас Вялікай Айчыннай вайны байцы гэтага падраздзялення не раз праяўлялі сябе на палях бітваў. У гісторыі ж суверэннай Беларусі на іх плечы кладзецца такая ж важная задача, а менавіта забеспячэнне бесперабойнай сувязі для вышэйшага кіраўніцтва нашай краіны.
Памяць аб Вялікай Айчыннай вайне праходзіць чырвонай ніткай праз гісторыю падраздзялення. У дзень 75-годдзя палка на тэрыторыі часці адкрылі стэлу ў памяць аб загінуўшых савецкіх ваеннапалонных. Падчас вайны тут знаходзіўся нямецкі лагер "Шталаг 342", дзе за гады вайны было знішчана больш за 33 тысяч чалавек.
Хвалебныя старонкі гісторыі захоўвае музей часці. Тут жа захоўваецца і першы баявы сцяг, які прайшоў з батальёнам усю вайну. Сфарміравалі падраздзяленне сувязі ў Свярдлоўску. Яго байцы ўдзельнічалі ў шматлікіх аперацыях, вызвалялі Арол, Рагачоў, Беласток і дайшлі да Брандэнбурга. Ужо ў пасляваенны час ні адны вучэнні не праходзілі без удзелу палка. Быў беларускі полк і ў Афганістане, а таксама падчас ліквідацыі наступстваў чарнобыльскай катастрофы. Поры змяняліся, задача заставалася нязменнай.
Калі гаварыць аб абсталяванні, то ў распараджэнні палка адразу некалькі так званых вузлоў сувязі. З выгляду гэта ваенныя МАЗы, аднак начынне такіх машын дазваляе забяспечваць бяспечную сувязь для вышэйшага кіраўніцтва краіны, у тым ліку Прэзідэнта, у любым пункце Беларусі. А сувязь для вышэйшых службовых асоб павінна быць бесперабойнай, надзейнай і закрытай.
Зрэшты, аб абсталяванні тут гаварыць не прынята, як сам полк, так і праца байцоў і афіцэраў знаходзіцца ў статусе сакрэтнасці. Як гавораць самі сувязісты, іх не павінна быць ні відаць, ні чуваць. У апошнія 5 гадоў у полк паступілі новыя ўзоры тэхнікі сувязі, лічбавае абсталяванне - тут толькі самыя апошнія ўзоры.
Як і ў любой прафесіі, добры вынік залежыць ад кадраў. Адбор сюды самы сур'ёзны. Трэба сказаць, што і падчас службы ўсе якасці маладых байцоў, як фізічныя, так і маральныя, паднімаюць на высокі ўзровень. Аб якасці такой школы гаворыць і статыстыка, у будучыні, большасць тэрміновікаў працягваюць службу ў розных сілавых і ваенных ведамствах, а таксама МНС.
Каб баец, як кажуць, не адцягваўся на бытавую бязладзіцу, той самы побыт таксама арганізаваны на належным узроўні. Пачынаючы ад казарм і сталовай, заканчваючы афіцэрскім пакоем і спартыўнымі пляцоўкамі. Зрэшты, самае галоўнае, гэта выхаванне годных кадраў. Падчас візіту ў полк, старшыня Камітэта дзяржаўнай бяспекі Валерый Вакульчык выказаў упэўненасць, што кожны з вайскоўцаў ганарыцца сваёй прыналежнасцю да такой важнай справы.
Паводле слоў кіраўніцтва падраздзялення, улічваючы рэаліі сучаснага жыцця, выклікі і пагрозы, шматлікае змяняецца. Неабходныя новыя падыходы, як у абсталяванні, так і ў падрыхтоўцы. Усё гэта ёсць і ўкараняецца, задача ж застаецца нязменнай. А бяспечная сувязь урада - гэта, у першую чаргу, стратэгічная бяспека нашай краіны.
