Паводле добрай традыцыі ў Дзень горада праходзіць Мінскі паўмарафон. Ужо заўтра аматары бегу адправяцца пакараць вуліцы сталіцы. Дыстанцый, як і раней, будзе тры. Гэта 21, 10 і 5 з паловай кіламетраў. Галоўная навіна - паўдзельнічаць у масавым забегу змогуць не больш як 10 тысяч чалавек. Абмежаванне звязана з пандэміяй. На гэты момант зарэгістраваліся актывісты з 215 населеных пунктаў Беларусі. Таксама заяўкі падалі 500 іншаземцаў з 40 краін і 183 гарадоў свету. Маршрут паўмарафона не зведаў змен. Гэта сертыфікаваная траса. А каб падтрымаць спартсменаў, арганізатары падрыхтавалі 12 музычных пляцовак. Будуць працаваць пункты харчавання і піцця, а таксама зоны ахаладжэння. Забегі на сярэдняй і самай доўгай дыстанцыях стартуюць у нядзелю роўна ў 9 раніцы. Удзельнікі самай папулярнай гонкі (гэта значыць на 5 з паловай кіламетраў) пачнуць бегчы ў 11:45. З-за правядзення паўмарафона рух транспарту на некаторых участках дарог у Мінску часова зачыняць.
Ужо з гадзіны ночы да 15:00 немагчыма будзе праехаць па праспекце Пераможцаў - ад вуліцы Нямігі да праспекта Машэрава. З 6 раніцы да 14:00 дабрацца ў цэнтр сталіцы можна будзе толькі на метро. Транспарт пусцяць па часовай схеме руху ў аб'езд. Будуць зачынены ўчасткі дарог па вуліцах Леніна, Янкі Купалы, Старажоўскай, Максіма Багдановіча, а таксама праспектах Незалежнасці, Пераможцаў і Машэрава. З 7 раніцы перакрыцце адбудзецца на вуліцах Нарачанскай, Вясёлкавай, Энгельса, Валадарскага, Кісялёва, Камуністычнай і Заслаўскай. Графік перакрыцця апублікаваны на сайце ДАІ горада. Таксама там даступныя схемы руху грамадскага транспарту ў святочны дзень. Плануйце свой маршрут загадзя!