ДАІ Мінска практычна завяршыла падрыхтоўку прышкольных дарог да новага навучальнага года. Устаноўлена больш за 500 дарожных знакаў, а таксама каля 40 штучных няроўнасцяў.
Ці эфектыўныя гэтыя меры бяспекі, высветліла Дар'я Бігун.
Новы навучальны год - новая арганізацыя дарожнага руху. Сталічныя інспектары да пачатку школьнага сезона ўстанавілі дадатковыя дарожныя знакі, зрабілі новую разметку, абсталявалі новыя пешаходныя пераходы. Усе для таго, каб зрабіць рух дзяцей у школу максімальна бяспечным.
Апошні тыдзень для інспектараў ДАІ аказаўся асабліва напружаным.
Зрабіць дарогу да школы бяспечнай інспектарам дапамагаюць і самі школьнікі. У сярэдняй школе № 53 арганізаваны атрад юных інспектараў руху. Вучні сярэдніх класаў праводзяць тэматычныя акцыі - у дзіцячых садках расказваюць дзецям аб дарожных знаках і навучаюць іх правільна паводзіць сябе на дарозе. Юля, капітан каманды юных інспектараў, распавядае, што дзеці вельмі задаволеныя тым, што складаныя дарожныя тэрміны ім простай мовай тлумачаць не інспектары ДАІ, а амаль іх аднагодкі.
Супрацоўнікі ДАІ з парушальнікамі асабліва не цырымоняцца. Нягледзячы на тое, што за апошні тыдзень вадзіцелі былі папярэджаны аб узмоцненай эвакуацыі, няправільна прыпаркаваных аўто каля навучальных устаноў шмат.
За апошні год сталічнае ДАІ зрабіла максімальна бяспечнай дарогу ад дома да школы. І зараз справа толькі за самімі школьнікамі і, зразумела, іх бацькамі. Інструктаж па правілах дарожнага руху ў апошні дзень жніўня варта правесці дома з кожным школьнікам.
