Больш за 300 сталічных двароў прывялі ў парадак за першую палову гэтага года

Усе работы выканалі камунальшчыкі, а вось аплацілі іх самі жыхары, не чакаючы капітальнага рамонту. Спецыялісты адзначаюць: усе больш мінчан жадаюць зрабіць свой двор, пад'езд і дом больш утульнымі і камфортнымі.

Прыгожа жыць не толькі не забараняюць, але і дапамагаюць - пераканалася Антаніна Станкевіч.

Новенькая дзіцячая горка, некалькі арэляў, шведская сценка і футбольнае поле. Яшчэ год таму на гэтым месцы ў адным са сталічных двароў была небяспечная пустэча. А зараз пагуляць сюды прыходзяць дзеці з усёй акругі. Вечарамі збіраюцца па 70 чалавек.

Кошт такога дзіцячага комплексу - 70 мільёнаў рублёў. Самім жыхарам дома такое задавальненне абышлося ў 117 тысяч з кватэры. Калі раскідаць усю суму на жыхароў - атрымліваецца не так жахліва. Да таго ж, кошт паслуг уключаюць у камунальныя плацяжы - спецыяльна хадзіць у банк ці на пошту не прыйдзецца.

А гэты двор здзіўляе адсутнасцю аматараў прыпаркавацца на зялёнай зоне. Паўсюль засцерагальныя сферы, якія не дазваляюць заехаць на бардзюр. Прычым, над імі папрацавалі мастакі. Жыхарам дома гэта спадабалася, і яны пайшлі далей у жаданні зрабіць свой дом яшчэ больш прыгожым.

Часцей за ўсё мінчане мяняюць дзіцячае абсталяванне, разбіваюць кветнікі, высаджваюць дрэвы, а таксама рамантуюць пад'езды і абсталёўваюць новыя парковачныя месцы. Людзі гатовыя рабіць усё гэта за свой кошт.

Камунальнікі ініцыятыву жыхароў падтрымліваюць. Напрыклад, у ЖЭСе дапамогуць знайсці мастакоў - калі гаворка ідзе пра размалёўванне пад'езда. А рабочыя выканаюць рамонтныя работы якасна і хутка. І самае галоўнае - па дзяржрасцэнках. Было б толькі жаданне прыгожа жыць.