12 гадоў ідзе барацьба за камфорт у сваіх кватэрах

17 Жніўня 2013
Жыхары дома па вуліцы 3 Ліпеня ў Радашковічах вось ужо 12 гадоў спрабуюць адстаяць правы на камфорт у сваіх кватэрах. Але пакуль жывуць ва ўмовах, далёкіх ад нармальных. Цякуць трубы, сцены пакрываюцца чорнай цвіллю, таму зелянеюць са злосці і самі жыхары.

Як выправіць сітуацыю, раскажа Таццяна Кашпур.

Былы дзіцячы сад у Радашковічах 13 гадоў таму стаў шматкватэрным домам. А цяпер жыллём, мала для жыцця прызначаным. Прычым на першы погляд ён даволі прыстойны: стаяць шклопакеты, пафарбаваныя сцены. А вось выгляд унутры сумны.

Вераніка Шыманец, мясцовая жыхарка: У кватэрах некаторых каналізацыя проста з другога паверха плыве на першы, і людзі выносяць яе вёдрамі. І так усю зіму. Яшчэ адна праблема - дом засялялі ў два этапы. Тым, каму давалі другім кватэры, іх уцяплілі. А ў нас холадна. У нас дзеці ў адзенні спяць.

Нейкія работы ўсё ж праводзіліся. Залаталі частку даху, каля года таму рамонтнікі звярнулі ўвагу і паправілі каналізацыю. Але ўзімку старыя трубы зноў пацяклі. Карыстацца выгодамі цывілізацыі прыходзіцца ў суседзяў, нават гарачай вадой. Тым не менш, з жыхарамі быў заключаны дагавор пажыццёвага найму. А перадавікі атрымалі дазвол на афармленне дакументаў. Але каб людзі змаглі самі абслугоўваць свой дом, некалькіх паўнапраўных уладальнікаў недастаткова. Уласнікамі павінны быць усе. Арганізавана падаваць дакументы жыхары чамусьці не сталі.

Дзмітрый Рабы, дырэктар ААТ Купала-Агра: Звароты ад грамадзян былі толькі наконт прыватызацыі кватэр. Асноўная маса атрымала дабро. Грамадства не ў стане будаваць жыллё і праз паўгода яго прадаваць, інакш застанемся без рабочай сілы.

Людзі прызнаюцца - праца ў іх цяжкая. Але пакуль была надзея на пераафармленне кватэр у іх уласнасць, яно таго каштавала. Але адпрацаваўшы 5 гадоў і больш - такі тэрмін даваў права на прыватызацыю, атрымаць доўгачаканыя метры так і не змаглі.

Сход акцыянераў ужо павінен быў адбыцца. Але яго адмянілі. Хоць пра такую гучную на мясцовы маштаб падзею пісалі нават рэгіянальныя СМІ. Праблема знайшла разуменне ў Адміністрацыі Прэзідэнта і ў аблвыканкаме. Прыйшла пастанова гаспадарцы на працягу месяца альбо прадаць, альбо прывесці дом у парадак. А воз і цяпер там.

Але, магчыма, усё ж такі зрушыцца з месца. Літаральна сёння нам сказалі, што рашэнне па гэтым доме ў райвыканкаме прынялі, і людзі ўжо ў найбліжэйшы час змогуць стаць паўнапраўнымі гаспадарамі сваіх кватэр.