Юныя віртуозы-скрыпачы са Швейцарыі далі канцэрт у Мінску

26 Верасня 2019

Юныя альпійскія віртуозы. Прэзентацыя міжнароднага праекта прайшла ў Мінску ў канцэртнай зале "Верхні горад". Юныя скрыпачы са Швейцарыі выконвалі класічныя хіты разам з музычнай капэлай "Санорус".

На канцэрце пачаткоўцаў і прафесіяналаў пабывала Ларыса Гулякевіч. Ілвэ Эйгус толькі дванаццаць, але на скрыпцы яна іграе ўжо з трох з паловай гадоў. Першыя поспехі зрабіла ў восем, калі дэбютавала з сімфанічным аркестрам. Выконвала такі складаны твор, як скрыпічны канцэрт Дзмітрыя Кабалеўскага. Музычны талент атрымала ад бацькі. Ён - таксама музыкант, джазавы.

Юных віртуозаў скрыпічнага мастацтва, што прыехалі ў Беларусь са Швейцарыі, аб'ядноўвае Школа музыкі ў Цюрыху імя Захара Брона - вядомага прафесара, якога называюць жывой легендай ў свеце класічнай музыкі. Ён выкладаў такім сусветна вядомым зоркам скрыпічнага мастацтва, як Максім Венгераў і Вадзім Рэпін. Вядомыя класічныя творы Моцарта, Вівальдзі і Сен-Санса прапанаваныя ў новай музычнай інтэрпрэтацыі.

Школа Захара Брона існуе 15 гадоў. Толькі за апошні год адзінаццаць навучэнцаў занялі першыя месцы ў міжнародных конкурсах Італіі, Францыі, Манака. Зараз гастрольную карту дапоўніла Беларусь. Безумоўна, поспех вучняў у большасці залежыць ад педагога. Гэтых маленькіх музыкантаў вядзе Ліяна Траццякова - вучаніца і асістэнт мэтра Захара Брона. З аднаго боку, яна працягвае традыцыі майстэрства свайго настаўніка, з іншага - добра валодае італьянскай, англійскай і рускай скрыпічнымі школамі і прапаноўвае выхаванцам сінтэз традыцый.
Сапраўдныя класічныя хіты дзеці ад 8 да 12 гадоў выконвалі з прафесійнымі музыкантамі - заслужаным калектывам Беларусі музычнай капэлай "Санорус". На сцэне канцэртнай залы "Верхні горад" гучалі класічныя творы як у новым прачытанні, так і ў трактоўцы, якую задумалі самі кампазітары.