Самыя яркія моманты і эмоцыі закадравага і сцэнічнага жыцця міжнароднага песеннага конкурсу, толькі ўжо дзіцячага "Еўрабачання-2018", падрыхтавалі Белтэлерадыёкампанія і выдавецтва "Беларуская энцыклапедыя імя Петруся Броўкі". У рамках міжнароднай кніжнай выставы, якая заўтра адкрываецца ў "БелЭкспа", адбудзецца прэзентацыя спецыяльнай еўравізійнай брашуры. З гэтай падзеі адкрыецца дзіцячая пляцоўка форуму.
Што будзе адбывацца на цэнтральнай - даведаемся ў Наталлі Тарасюк.
Мантаж экспазыцыі ў комплексе "БелЭкспа" пачаўся ў дзве гадзіны дня. Удзельнікам трэба будзе распакаваць і выставіць некалькі тон кніг. І, хутчэй за ўсё, афармленне стэндаў будзе працягвацца да паўночы. Гатоўнасць выставы, якая адкрыецца заўтра апоўдні, сёння ацэніць Міністэрства інфармацыі.
Першай падзеяй стане перадача ўнікальных экспанатаў Нацыянальнай бібліятэцы. Калекцыянер і гісторык Уладзімір Ліхадзедаў сёння асабіста рыхтаваў да адкрыцця экспазыцыю "У пошуках страчанага". Гэта толькі малая частка яго 50-тысячнага збору паштовак. Цэнтральнае месца займае рэканструяваны друкаваны станок 16-га стагоддзя. Але каштоўнасці, якія адправяцца на захоўванне ў "алмаз ведаў", калекцыянер эксклюзіўна прадэманстраваў нашай здымачнай групе.
Уладзімір Ліхадзедаў ужо працуе над новымі кнігамі. Яны будуць прысвечаныя Слоніму і яго наваколлям, Навагрудку, Гродну, Нясвіжу. Адразу некалькі зборнікаў, на старонках якіх кожны беларус можа прачытаць аб сваёй малой радзіме і яе артэфактах, прадставіць "Беларуская энцыклапедыя імя Петруся Броўкі". Гэта працяг серыі "Гарады і вёскі". Новае выданне - "Рэгіёны Беларусі".
Выдаўцам атрымалася на паперы зафіксаваць самыя прыкметныя падзеі ў жыцці нашай краіны - і культурныя, і спартыўныя, і мінулыя, і будучыя. Да II Еўрапейскіх гульняў рыхтавалі адмысловую промапрадукцыю. Яе ўпершыню пакажуць на гэтай выставе. Спецыяльна да дзіцячага "Еўрабачання", якое другі раз прымала Беларусь, у суаўтарстве з Белтэлерадыёкампаніяй выйшла маляўнічая брашура. З прэзентацыі гэтага праекта пачне працу дзіцячая пляцоўка.
Сяргей Кайкін, гендырэктар генеральнай дырэкцыі міжнародных кніжных выстаў і кірмашоў: "Самы галоўны акцэнт сёлета - гэта дзіцячая літаратура. У нас цэлая асобная пляцоўка будзе прысвечаная дзяцінству. Ні разу мы такога яшчэ не рабілі. Цэлая пляцоўка - гэта і майстар-класы, выступленні аўтараў, прэзентацыя кніг, выступленні псіхолагаў. Усё для дзяцей".
Кніжная выстава да канца тыдня стане галоўным месцам сустрэчы літаратараў, выдаўцоў, пісьменнікаў і чытачоў. Можна будзе не толькі даведацца аб навінках, але і адразу набыць іх, яшчэ з пахам друкарскай фарбы.
