У пачатку новага года ў Беларусі па традыцыі ўручаюць прэстыжныя прэміі "За духоўнае адраджэнне" і спецыяльныя прэміі Прэзідэнта. Сёння ў Палацы Рэспублікі Кіраўнік дзяржавы асабіста ўзнагародзіць тых людзей, якія паспяхова захоўваюць культурную спадчыну нашай краіны.
Пра тых, хто робіць нашу краіну багацейшай - духоўна і маральна, - сюжэт Аляксея Адашкіна. Прэмія "За духоўнае адраджэнне" ўручаецца ўжо на працягу дзевятнаццаці гадоў. Гэтую прэстыжную ўзнагароду атрымліваюць людзі розных прафесій - ад святароў і да навукоўцаў і дактароў. Але ўсіх лаўрэатаў аб'ядноўвае адно: сваёй працай і мэтанакіраванасцю яны робяць Беларусь багацейшай - духоўна і маральна.
Цырымонія ўшаноўвання лаўрэатаў прэміі "За духоўнае адраджэнне" і спецыяльных прэмій Прэзідэнта кожны год праходзіць у калядныя дні. Гэта ўжо стала добрай і сімвалічнай традыцыяй. Бо менавіта адданасць хрысціянскім каштоўнасцям з'яўляецца адным з галоўных фактараў у развіцці беларускай нацыі і захаванні яе адзінства. Па выніках 2015 года прысуджаныя пяць прэмій "За духоўнае адраджэнне". Імі адзначаная актыўная дзейнасць у гуманітарнай сферы. Сярод лаўрэатаў гэтай высокай узнагароды - творчы калектыў, які працаваў над стварэннем кнігі-рэквіема "Жыць і памятаць", у складзе пазаштатнага супрацоўніка галоўнай дырэкцыі міжнароднага вяшчання Беларускага радыё Алены Харашэвіч і прафесара Акадэміі МУС Анатоля Шаркова. Прэміяй адзначаны епіскап Барысаўскі і Мар'інагорскі Веніямін, які ўнёс важкі ўклад у духоўнае адраджэнне Беларусі. За захаванне жыцця і здароўя маці і дзяцей узнагароджаны калектыў навукова-практычнага цэнтра "Маці і дзіця". Калектыў Нацыянальнага мастацкага музея Беларусі адзначаны за ўмацаванне духоўных каштоўнасцяў у сучасным грамадстве. Сярод лаўрэатаў і настаяцель рэлігійнай суполкі Святой Троіцы з вёскі Росіца Верхнядзвінскага раёна Часлаў Курэчка.
Па выніках 2015 года прысуджаныя і 10 спецыяльных прэмій Прэзідэнта. Сярод лаўрэатаў - калектыў Вялікага тэатра краіны за оперу "Царская нявеста", Музей гісторыі Вялікай Айчыннай вайны, вядучыя тэатральныя калектывы краіны, мастакі, скульптары. Сярод лаўрэатаў спецпрэміі Прэзідэнта і нашы калегі: спецкарэспандэнт аддзела навін культуры АТН Наталля Бардзілоўская, галоўны рэжысёр Агенцтва тэленавін Алег Даўгаполаў і загадчык аддзела навін культуры Міхаіл Равуцкі. Яны ўзнагароджваюцца за стварэнне гісторыка-дакументальнага серыяла "Яны спявалі за Радзіму". Гэта праект з дзесяці тэленавел, кожная з якіх даследуе гісторыю з'яўлення знакавых і ўсім вядомых песень. У фільмах легендарныя кампазіцыі гучаць у выкананні дзіцячага хору.
Па традыцыі ўрачыстае ўручэнне прэмій "За духоўнае адраджэнне" і спецпрэмій Прэзідэнта пройдзе ў Палацы Рэспублікі. Падарункам для ўсіх лаўрэатаў стане і спецыяльны канцэрт. Убачыць усю цырымонію змогуць і тэлегледачы: сёння адразу пасля праграмы "Панарама" ў эфір выйдзе тэлеверсія ўзнагароджання.
