Тут пачынаецца Міжнародны музычны фестываль імя Івана Салярцінскага. Сёння іграюць уверцюру фестывалю. Са сцэны абласной філармоніі будзе гучаць музыка Баха і Гендэля ў выкананні італьянскага арганіста Эўджэніа Фаджыяні. Усяго ж 27-ы па ліку фестываль збярэ выканаўцаў з пяці краін свету.
Расказвае Вольга Маслоўская.
Віцебскі фестываль класічнай музыкі традыцыйна праходзіць на пачатку снежня. Прымеркаваны ён да дня нараджэння вядомага крытыка і музыкаведа, ураджэнца Віцебска Івана Салярцінскага. Яго сын Дзмітрый - натхніцель снежаньскіх музычных вечароў - прыязджае на фестываль і ўдзельнічае ў навуковых чытаннях.
Сёлета яны прысвечаныя мастацкаму асяроддзю Івана Салярцінскага і актуальным пытанням сучаснага мастацтвазнаўства. Калі гэтая частка фестывальнай праграмы цікавая навукоўцам і даследчыкам, то канцэрты класічнай музыкі збіраюць самую шырокую аўдыторыю. На 27-м фестывалі будуць іграць выканаўцы з пяці краін свету.
Фестываль прадоўжыцца 18 дзён. А яшчэ нагадае аб сабе ў сакавіку будучага года. Тады пройдзе спецыяльны канцэрт трыа "Вітруві" з Даніі, арганізаваны пры садзейнічанні Дацкага інстытута культуры. Такім працяглым фестываль стаў з-за жадання арганізатараў запрасіць у горад на Дзвіне выбітных музыкантаў, таму даводзіцца падстройвацца пад іх гастрольныя графікі.
Па асабістым запрашэнні Дзмітрыя Салярцінскага ў Віцебск прыедзе лаўрэат міжнародных конкурсаў Майкл О'Рурк з Ірландыі. Яго фартэпіянны канцэрт называецца "Музыка ночы". Адзін з вечароў будзе прысвечаны 180-годдзю польскага скрыпача і кампазітара Генрыка Вяняўскага.
