Фільм з нулявым бюджэтам або крымінальны дэтэктыў ад тытанаў беларускага кінематографа. У сталічным Доме кіно адбылася вялікая прэм'ера. Стужку "Недатыкальнасць", знятую без дзяржаўных капіталаўкладанняў, створаную незалежна ад нацыянальнай кінастудыі, прэзентавалі знакамітыя беларускія майстры кадра Юрый Ялхоў і Дзмітрый Зайцаў. Ці ўжываюцца два мэтры на адной здымачнай пляцоўцы, што ў аснове вострасюжэтнага дэтэктыва - ведае наш карэспандэнт Дар'я Тарасава.
Беларускі кінарынак узрушаны. На пляцоўку выходзяць карыфеі - Ялхоў і Зайцаў. Майстры кадра не па чутках ведаюць, што такое прыгожая карцінка. Для вялікіх экранаў як аператары здымаюць яшчэ з 70-х. Абодва на пенсіі. Але скачок з плёнкі на лічбу ім не страшны. Асвоілі прадакшн, знялі поўны метр і па сучасных канонах кінематографа ахрысцілі сябе фільмейкерамі. Хай сам "Беларусьфільм" і не мае да карціны ніякага дачынення, новая стужка "Недатыкальнасць" - справа рук майстроў, якія забяспечылі студыі славу.
Праз аб'ектыў Ялхова краіна ўбачыла культавы беларускі блокбастар "Анастасія Слуцкая", а таксама шэраг савецкіх кінаказак "Прыгоды Бураціна" і "Чырвоная Шапачка". Імя Дзмітрыя Зайцава таксама хрэстаматыйнае. Сярод яго аператарскіх прац - "Людзі на балоце". Апантаныя ідэяй, не ўзяўшы ні капейкі з дзяржбюджэту і нават не прыцягваючы спонсараў, фільм энтузіясты знялі на свае ўласныя фінансы. Здымачнае абсталяванне знайшлося ў Ялхова. У рэжысёра свая хатняя студыя. Артыстаў на галоўныя ролі адшукалі, паклікаўшы нашых беларускіх акцёраў, у Ялхова - Зайцава згадзіліся здымацца добраахвотна. Ролі - за заслужанымі і вядучымі Аляксандрам Кашперавым і Вольгай Рэптух. Дамовіліся на тым, што зарплату атрымаюць пасля таго, як фільм стане рэнтабельным, гэта значыць выйдзе ў пракат.
У аснове стужкі "Недатыкальнасць" - аповед "Голас у ночы" заходняга пісьменніка Роберта Колбі, герой якога ўчыняе злачынствы і застаецца беспакараным. Амерыканскую гісторыю адаптавалі да мінскіх дэкарацый, карціну здымалі на радзіме. Здымкі і мантаж завяршылі ўсяго за два месяцы.
Пракатнай гісторыяй стужкі Ялхоў і Зайцаў зоймуцца асабіста. Загартаваныя савецкай класікай мэтры штурмуюць суровы кінарынак. "Недатыкальнасць" ужо аблічбавалі для вялікага экрана, перавялі на англійскую мову і прасубцітравалі. Фестывальны маршрут крымінальнага дэтэктыва: Злучаныя Штаты - Расія.
