Персанальная выстава да 75-годдзя мастака-пастаноўшчыка і мастака-дэкаратара "Беларусьфільма" Івана Рагаценя адкрылася ў выставачнай зале Музея гісторыі беларускага кіно. Майстар з дыпломам архітэктара стварыў дзясяткі дэкарацый для айчынных сінема-бестселераў. За паўстагоддзя стаў класікам нацыянальнага кінематографа: узнавіў гістарычнае асяроддзе для стужкі Валерыя Рубінчыка "Магіла льва", узвёў штаб у павільёне "Беларусьфільма" для "У жніўні 44-га", а для карціны "Полымя" пабудаваў кабінет Сталіна. Увогуле аформіў больш за 35 праектаў.
За работу над серыялам "Вольф Месінг" трапіў у шорт-ліст ТЭФІ
Сярод прыкметных экранных праектаў Івана Рагаценя - і візуальнае рашэнне для серыяла "Вольф Мессінг: Які бачыў скрозь час". За працу над містычнай гісторыяй пра чалавека, які чытаў думкі і бачыў будучыню, трапіў у шорт-ліст прэстыжнай прэміі ТЭФІ.