Аляксандра Драгун паспрабавала сябе ў тэатральным мастацтве.
У Алега Шульгі дзве тэхнічныя спецыяльнасці, але прага творчасці прывяла хлопца ў тэатральную лабараторыю. Разам з акцёрамі-аматарамі ён спасцігае асновы вулічных выступленняў.
"Лабараторыя вулічнага тэатра" - новы праект ад акцёраў калектыву "Тэатр42". Гэта своеасаблівая школа, дзе рыхтуюць усіх, хто жадае, да сцэны пад адкрытым небам.
Для заняткаў не трэба пэўных дэкарацый і антуражу. Галоўнае - прасторнае памяшканне. Вучні становяцца па перыметры залы вакол настаўніка. Адно аднаго пакуль не ведаюць, але трэба разняволіцца.
На гэтых занятках не трэба занатоўваць лекцыі. Галоўнае ў лабараторыі тэатраў - практыка. Практыкаванне "Люстэрка" дапамагае развіваць бакавы зрок і ўвагу. Каб быць не адзіным акцёрам, а цэлым калектывам.
На першы ўрок прыйшлі 60 вучняў ва ўзросце ад 18-ці да 30-ці гадоў. Каб было зручней, іх падзялілі на тры групы. Працуюць пакуль над тэатральнымі пастаноўкамі, таму знешні выгляд адвольны.
Акцёры-пачаткоўцы тут і рэжысёры, і пастаноўшчыкі, і грымёры. Некалькі месяцаў яны будуць працаваць над перформансамі. Прэм'еры пройдуць летам. Глядзець на галоўных вуліцах горада.
Вынік працы ў лабараторыі мінчане ўбачаць акурат з 1 па 3 мая на форуме вулічных тэатраў. Сярод мімаў і жывых скульптур свае здольнасці прадэманструе новая армія вулічных артыстаў. А маладыя акцёры змогуць атрымаць майстар-клас ад спецыялістаў у галіне гарадскога мастацтва і паблік-арта.