Першы камень у падмурак заклалі ў 1583 годзе. Тады ўзвядзеннем замка кіраваў італьянскі архітэктар Джавані Бернардоні. Але ў сувязі з войнамі і бітвамі крэпасць неаднаразова перабудоўвалася майстрамі ўсёй Еўропы.
Паступова абарончы комплекс ператварыўся ў палацава-замкавы ансамбль. Рэнесанс і класіцызм, барока і мадэрн - тут пераплецены розныя стылі і эпохі. 8 тысяч квадратаў і больш за 30 магнацкіх залаў. Зараз гэта помнік Сусветнай спадчыны ЮНЕСКА.
Аўтэнтычныя экспанаты сямейнай рэзідэнцыі Радзівілаў
Радавое гняздо Радзівілаў аднаўлялі па рэдкіх фотаздымках і гістарычных дакументах. А фамільныя прадметы шукалі па ўсім свеце. Сапраўднай знаходкай стаў жаночы спальны гарнітур з 15 прадметаў. Усяго ў фондах музея каля 30 тысяч экспанатаў. І іх колькасць пастаянна павялічваецца.Віталь Бядрыцкі, спецыяліст па міжнародных адносінах Нацыянальнага гісторыка-культурнага музея-запаведніка "Нясвіж": "Перад намі самыя апошнія набыцці нашага музея. Гэта рэчы, адзначаныя фамільным гербам Радзівілаў. Тут ён добра бачны на шкатулцы, на падносе. Гэта рэчы з чыстага серабра. Ёсць яшчэ незвычайны экспанат. Такая вось пасудзіна для ахаладжэння напояў. У цэнтры яе знаходзіцца колба, у якую змяшчаўся лёд. Ён і ахалоджваў напой".
