Сёння ў фестывальным Віцебску другі дзень XVII Міжнароднага дзіцячага музычнага конкурсу. Напярэдадні былі праспяваныя песні на роднай мове ўдзельнікаў. Сёння, згодна з правіламі спаборніцтва, юныя вакалісты выканаюць перад журы кампазіцыі па ўласным выбары. Беларуская канкурсантка выйдзе на сцэну бліжэй да фіналу, у яе 19-ты нумар. Ацэнкі журы не аб'яўляе. Інтрыга вырашыцца толькі ў дзень афіцыйнага адкрыцця "Славянскага базару" на гала-канцэрце.
Таксама ў праграме новага фестывальнага дня адкрыццё адразу чатырох выстаў. Пачынаецца тэатральная праграма - акцёры маскоўскага тэатра "Эрмітаж" пакажуць камедыю "Маленькая нядзельная прыгода". У 20 гадзін у Летнім амфітэатры ўрачыста будзе ўзняты флаг "Славянскага базару", а ў 22 гадзіны на галоўнай фестывальнай пляцоўцы пачнецца першы канцэрт - "Уверцюра да фестывалю: ад класікі да рока" з удзелам Пятра Ялфімава, Канстанціна Масковіча і Івана Вабішчэвіча.
