У дзень нараджэння Уладзіміра Мулявіна ў Белдзяржфілармонію вярнулася праграма "Вянок"

12 Студзеня 2018

У дзень нараджэння Уладзіміра Мулявіна ў Белдзяржфілармонію вярнулася праграма "Вянок" на вершы Максіма Багдановіча. Прэм'ера цыкла адбылася ў Нью-Ёрку ў 1991 годзе ў бібліятэцы Аб'яднаных Нацый.

А пасля вяртання легендарнага ансамбля "Пясняры" са Злучаных Штатаў праграму паказалі ў родных для Мулявіна сценах філармоніі. З тых часоў цалкам "Вянок" не выконваўся. Некаторыя песні з цыкла - такія, як "Слуцкія ткачыхі", "Лявоніха", "Вераніка" - сталі беларускай эстраднай класікай. Але, на жаль, нотны матэрыял праграмы "Вянок" не захаваўся. Яго аднавілі праз гады па аўдыёзапісе, які перадаў прыхільнік "Песняроў" Нацыянальнаму акадэмічнаму народнаму аркестру Беларусі імя Жыновіча. У памяць аб Мулявіне калектыў і вядучыя салісты выканалі 15 песень, якія па праве можна лічыць спадчынай 20 стагоддзя.

Праграму з цыкла "Вянок" можна будзе ўбачыць на тэлеканале "Беларусь 3" у дзень памяці Мулявіна - 26 студзеня. Акрамя таго, госці канцэрта сталі гледачамі дакументальнай стужкі "Пясняр. Сэрцам і думамі". Сёння Уладзіміру Мулявіну споўнілася б 77 гадоў.


Папулярныя

Рэкамендуемыя

Зараз чытаюць

Рэкамендуемыя