У Вялікім тэатры дадуць спектакль "Рыгалета" з удзелам зорак сусветнай оперы

25 Лютага 2020
Вялікі тэатр ангажуе зорак сусветнай оперы. Заўтра ў беларускай пастаноўцы "Рыгалета" дэбютуюць лаўрэат прэміі "Залатая маска" Надзея Паўлава і трыумфатар "Апераліі" Павел Пятроў, які, дарэчы, служыў у нашым тэатры 8 гадоў. Салістка пермскай оперы знаёмая нашаму гледачу як уладальніца Гран-пры Мінскага міжнароднага Каляднага конкурсу вакалістаў. За два дні да спектакля ў выканаўцаў адбыліся сумесная мізансцэнічная і аркестравая рэпетыцыі. 

Надзея Паўлава, салістка Пермскага тэатра оперы і балета, заслужаная артыстка Расіі: "Я ведаю, што нават у Мінск прыедуць з Расіі прыхільнікі, каб спецыяльна паслухаць. Таму вось такая падзея добрая і прыемная для абедзвюх краін. Усё адно да аднаго - і тое, што публіка любіць нас і чакае, і, безумоўна, музыка Вердзі геніяльная. І як я гаварыла, гэта такі бенефісны спектакль для барытону, дзе такая палітра эмоцый адбываецца ў артыста".

Павел Пятроў, саліст Нацыянальнага акадэмічнага Вялікага тэатра оперы і балета Беларусі, пераможца конкурсу "Апералія-2018": "У мяне быў тыдзень, я трошкі ўспомніў, паўтарыў "Рыгалета" і вось ужо прыехаў да нас. Прыехаў спецыяльна загадзя 19 лютага, каб паспець і да родных з'ездзіць, каб усіх убачыць, каб і ў тэатры парэпеціраваць. Я прывык ужо да меншых сцэн, таму акустыка будзе для мяне ў пачатку зноў нязвыклая. У "Рыгалета" на нашай беларускай сцэне для мяне будзе дэбют".

Спектакль "Рыгалета" - першая сур'ёзная калабарацыя оперных выканаўцаў. Разам яны спявалі "Травіяту" ў канцэртным выкананні ў Кёльне. У сераду Павел Пятроў выйдзе на аўстрыйскую сцэну ў пастаноўцы "Дон Джавані", а Надзея Паўлава прыме ўдзел у спектаклі "Барока" ў Маскве.