У пастаяннай экспазіцыі - адразу 19 новых экспанатаў. Гэта рэдкія манеты 14 стагоддзя. Колькі каштуюць такія грошы, даведвалася Дар'я Тарасава.
Па мерках ВКЛ, дынарый Альгерда - гэта дробязь, але сёння за такую грашовую адзінку на аўкцыёнах калекцыянеры гатовыя выкласці тысячы долараў. Узяць хоць гэты сход, які абышоўся музею 7200 рублёў. Самая ранняя манета тут адносіцца да чаканкі Альгерда. Гэта імітацыя данга Залатой Арды. Зараз у калекцыі і Ягайлаўскія грошы, а таксама 6 манет, так званыя партрэтныя дынарыі, дзе з аднаго боку размешчаны леў з хвастом у выглядзе пляцёнкі, а з другога - ілюстрацыя з выявай каранаванай асобы.
Грошы за грошы. Каштоўныя артэфакты, а менавіта манеты, адчаканеныя па загадзе ВКЛ, папоўнілі збор Гістарычнага музея дзякуючы краўдфандынгу. Гэта даволі папулярная практыка, пры якой сродкі на фінансаванне праекта, у дадзеным выпадку музейнай ініцыятывы, прымаюцца ад усіх жадаючых.
Тут не убачыш вялікіх бліскучых манет. Ад гэтых экспанатаў сапраўды вее гісторыяй. Дату выпуску гэтых артэфактаў можна вызначыць фактычна без памылак дзякуючы іх жа вазе. Тыраж раннелітоўскіх грошай 14 стагоддзя быў невялікім. Існуе думка, што такія манеты гэта хутчэй “першая спроба пяра”. Іх чаканілі не з мэтай ужываць у грашовым абароце, а каб заявіць аб з'яўленні новай дзяржавы.
Сваю вартасць яны пацвярджалі вагой, бо вырабляліся рэзчыкамі з каштоўных металаў, у дадзеным выпадку з высакароднага серабра. Тэхналогіяй стварэння такіх грашовых сродкаў у асноўным была дротавая чаканка. Датаванне, атрыбуцыя, месца чаканкі, менавіта па такіх даных сучасныя нумізматы маюць магчымасць ідэнтыфікаваць і прасачыць развіццё манетнай справы ВКЛ. Частку гэтых старажытных грошай выявілі дзякуючы знаходцы скарба ў Маладзечанскім раёне. Некалькі манет былі прэзентаваны прыватнымі калекцыянерамі.
Сёння гэтыя манеты эпохі ВКЛ не проста мара любога нумізмата. Для гісторыкаў - гэта магчымасць узнавіць аблічча вялікіх князёў. Традыцыйна на манетах чаканілі партрэты магнатаў яшчэ пры іх жыцці. А вось кожная новая грашовая партыя цалкам адпавядала знешняму выгляду арыстакрата ў момант выпуску.
