Пакуль мінскія тэатры развітваюцца з гледачамі, закрываючы сезон, Тэатр-студыя кінаакцёра дае прэм'еру. Напярэдадні ў Мінску адбыўся паказ камедый Чэхава "Прапанова" і "Юбілей".
З прэм'еры наш карэспандэнт - Дар'я Тарасава. Эксперыменты ставіць не будуць. П'есы Чэхава, яны ж "жарты ў адным дзеянні", перад публікай паўстануць у класічным выглядзе. Чэхаўскую эпоху на сцэне акцёры ўвасабляюць не толькі з дапамогай касцюмаў і грыму, але і музыкі. Арыгінальныя мелодыі да спектакля напісаў беларускі кампазітар Валерый Воранаў.
Дзве чэхаўскія п'есы ў адным спектаклі "Прапанова" і "Юбілей". Гэта прэм'ера для самога тэатра і першая праца рэжысёра-пастаноўшчыка Алега Кірэева з Чэхавым. Над праектам тэатралы працавалі паўтара года, чэхаўскія п'есы ў лепшых традыцыях класічнага тэатра паставіць не так проста. Трэба ўлічваць - над пастаноўкай працуюць сучасныя акцёры і аўтары.
У пастаноўцы задзейнічаны лепшыя сілы тэатра, акцёры, якія ўдастоены звання "заслужаны". У аснове сюжэта "Прапановы" так званы камунікацыйны збой. Гэтую тэму, якая актуальная і ў нашы дні, Чэхаў узняў яшчэ ў 1888. У маёнтку Чубукова разгортваюцца сапраўдныя страсці. Іван Васільевіч Ломаў адпраўляецца да суседзяў, каб зрабіць прапанову Наталлі Сцяпанаўне, але ажыццявіць запланаванае яму папросту не ўдаецца. Паміж героямі п'есы ўзнікае спрэчка за маёмасць, "каму ж належаць Валовыя Лужкі".
Гэта апошні спектакль у афішы, зноў гледачам яго пакажуць толькі ў новым 36-м сезоне, да якога пастаноўку абновяць. Героі чэхаўскіх п'ес у выкананні мэтраў беларускай сцэны паўстануць перад публікай ў новых касцюмах і сцэнічных дэкарацыях. Акрамя інтэрпрэтацый твораў рускіх класікаў убачыць можна будзе і англійскую п'есу. Назву яе ў тэатры пакуль трымаюць у сакрэце. Праца над пастаноўкай ужо ідзе, размяркоўваюць галоўныя ролі і вызначаюцца з творчай групай праекта. Вядома, што за тэатральнае ўвасабленне возьмецца мастацкі кіраўнік Тэатра-студыі кінаакцёра Аляксандр Яфрэмаў.
