Шумна, музычна і па-спартыўнаму энергічна Мінск рыхтуецца адзначыць Дзень горада

Сталіца рыхтуецца ярка сустрэць 952-гі дзень нараджэння! Ужо ў суботу Мінск ператворыцца ў вялікую святочную пляцоўку.

Асабліва шумна і па-спартыўнаму з запалам будзе ля Палаца спорту. Трукі ад каскадзёраў, шоу байкераў. Яго прысвецяць закрыццю мотасезона. Наймацнейшага выберуць сярод ратавальнікаў-пажарнікаў. На турнір прыедуць прадстаўнікі Расіі, Польшчы, Германіі. Увесь дзень тут будзе працаваць і кірмаш майстроў.

Ледзь далей - на скрыжаванні праспекта Пераможцаў і Машэрава - мінчане ўбачаць усе 9 стагоддзяў гісторыі Мінска - паводле традыцыі там пройдзе фестываль гістарычнай рэканструкцыі.

Не менш святочна будзе і ў Верхнім горадзе. Ля гарадской ратушы нон-стоп - музычная праграма, а яшчэ - урачыстая цырымонія шлюбу. 9 пар - па адной з кожнага раёна Мінска - ва ўнісон вымавяць запаветныя словы. І гэта толькі 3 лакацыі з дзясяткаў. Больш падрабязна аб святочнай афішы - Аляксандра Кавеліч.

Яркія лічбы на білбордах, пано і нават 3-мятровым торце. Перадсвяточны настрой напаўняе гарадскія вуліцы. Ужо ў гэтыя выхадныя гарадскі оpen air  пад хештэгам 952. Сталіца ператворыцца ў вялікую спартыўную, музычную і тэатральную пляцоўку.

Скрыжаванне Камсамольскай і Рэвалюцыйнай. Для каманды "Альтана" гэта раздарожжа не проста месца для прагулак. Тут рэпеціруюць і выступаюць. Удзельнікі гарадскога праекта "Ноу стэйдж"  без сцэны рыхтуюць свой творчы падарунак. 

Гэтыя вуліцы летам ператвараюцца ў імправізаваную сцэну. Цыркавыя трукі, замалёўкі пластычных тэатраў, танцавальныя шоу. Творчы фестываль кожны тыдзень прыадкрываў гледачам і проста прахожым розныя кірункі мастацтва. Яркую кропку першага сезона артысты як раз паставяць у Дзень горада. 

А зусім недалёка, на Кастрычніцкай плошчы, наадварот, упершыню разгорнецца канцэртная пляцоўка. Тут установяць вялікую сцэну. 

Так, у самім сэрцы сталіцы пад акампанемент Прэзідэнцкага аркестра павіншуюць уладальнікаў ганаровага звання "Мінчанін года".

У Верхнім горадзе, дзе кожныя выхадныя адкрываюць мінчанам культуру розных краін, і віншаванні будуць гучаць на дзясятках моў. 

Акцэнты святочных дэкарацый ужо з'явіліся на гарадскіх вуліцах. Напрыклад, над праспектам Пераможцаў узвышаецца рыцарскі гарадок Фестываль гістарычнай рэканструкцыі аб’яднае ўсе 9 стагоддзяў Мінска і рыцараў з Беларусі, Італіі, Галандыі. 

Ад рыцарскіх баталій да вулічных гонак і нават забегаў на абцасах. Шумна, музычна і па-спартыўнаму энергічна будзе не толькі ў суботу. У нядзелю святочную эстафету падхопяць удзельнікі Мінскага паўмарафона.