У юных здольнасцяў застаецца менш за суткі, каб заявіць пра сябе на ўвесь кантынент. Сёння апошні дзень прыёму заявак для ўдзелу ў нацыянальным адборы на дзіцячы конкурс песні "Еўрабачанне-2019". Арганізатарам праекта выступае Белтэлерадыёкампанія як адзіны ў нашай краіне член Еўрапейскага Вяшчальнага Саюза. Заяўкі для ўдзелу падаюцца ў электронным выглядзе. Азнаёміцца з палажэннем конкурсу можна на сайце медыяхолдынга tvr.by ў раздзеле "Спецпраекты".
Усе кампазіцыі, якія паступілі, перш ацэніць прафесійнае журы. Па выніках адборачнага тура судзейская калегія выбера ад сямі да дзесяці фіналістаў. Пераможца нацыянальнага адбору будзе вызначаны ў прамым эфіры падчас выніковага гала-канцэрта не пазней за 27 верасня. Трыумфатар адправіцца на дзіцячае "Еўрабачанне-2019", якое, нагадаем, 24 лістапада прыме польскі горад Глівіцэ.
