У свеце сёння саракавы раз адзначаюць Міжнародны дзень музыкі. У Беларусі гэтае свята традыцыйна праходзіць у рамках форуму класічнага мастацтва - фестывалю Юрыя Башмета. Тыднёвы акадэмічны марафон прапануе дзясятак канцэртаў і сузор'е музыкантаў з сусветнымі імёнамі. Сярод самых яркіх - візіт Каралеўскага аркестра Кансертгебау з Амстэрдама. Мінск у чаканні Легенды на скрыпцы Гварнеры ў выкананні Вадзіма Рэпіна.
Сёння ж у Белдзяржфілармоніі двайная падзея: творчы вечар ганаровага госця фестывалю - кампазітара Сафіі Губайдулінай і сусветная прэм'ера маладога аўтара Вольгі Падгайскай.
Фестываль Юрыя Башмета працягвае і пошук талентаў. Традыцыю музычных акадэмій і майстар-класаў сёлета падтрымалі сусветна вядомы піяніст з Ірландыі Бары Дуглас, кампазітар Сафія Губайдуліна і народны артыст Расіі дырыжор Дзмітрый Ліс. На працягу фестывалю пройдуць іх сустрэчы са студэнтамі Беларускай акадэміі музыкі.
