Маскі, скульптура і арт-аб'екты - ад гільдыі керамістаў. Індыя пад снегам і Афрыка ў сезон дажджоў - на фотаработах прафесіяналаў-падарожнікаў. І оперна-балетная праграма для дзяцей і дарослых у Вялікім тэатры Беларусі. Падрабязнасці ў Ларысы Гулякевіч. Рубрыка "Праменад".
Тэатральныя, карнавальныя і абрадавыя маскі ад беларускіх майстроў па кераміцы. Свае творы ў мастацкай галерэі "Універсітэт культуры" яны прадэманстравалі як у традыцыйнай тэхніцы працы з глінай, так і ў сучаснай, аўтарскай і эксперыментальнай.
"Між рукамі і полымем". Сярод экспанатаў, прадэманстраваных майстрамі гільдыі керамістаў, - інтэр'ерная кераміка, посуд, скульптура і арт-аб'екты. Падчас работы экспазіцыі, якая будзе доўжыцца да 30 сакавіка, пройдуць творчыя сустрэчы з мастакамі па фарфоры, а такcама майстар-класы па лепцы з гліны і роспісе керамічных вырабаў.
Па краінах і кантынентах. Выстава дзесяці прафесійных фотамастакоў адкрылася ў арт-гасцёўні "Высокае месца". Экспазіцыя - своеасаблівы візуальны аповед вопытных падарожнікаў праз фотаздымкі аб шматграннасці і прыгажосці свету.
Удзельнікі праекта - члены Беларускага грамадскага аб'яднання фатографаў "Фота Трэвел Клаб". Яны прадэманстравалі ўнікальныя фотакарціны з Ісландыі, Індыі, Італіі, Манголіі, краін Афрыкі. У фотааб'ектыў аўтараў выставы трапілі не толькі прыродныя з'явы і пейзажы, але і народныя святы і традыцыі розных народаў. Па суботах будуць праходзіць творчыя сустрэчы з мастакамі, якія падзеляцца сваімі прафесійнымі сакрэтамі.
Камічная опера Даніцэці "Дон Паскуале" - адзін з самых выдатных твораў кампазітара. У суботу - прэм'ерны паказ спектакля ў пастаноўцы Міхаіла Панджавідзэ. Вялікі тэатр Беларусі запрашае.
Здымачная група "Праменада" зазірнула на рэпетыцыю оперы. Галоўныя партыі выконваюць выключна маладыя салісты - Андрэй Кліпо, Андрэй Мацюшонак і Анастасія Храпіцкая. А Андрэю Сялюціну прыйшлося пераўвасобіцца ў сталага Дона Паскуале, які хоча ажаніць свайго пляменніка Эрнэста з багатай нявестай. Аднак малады чалавек не згодны з выбарам дзядзькі, ён закаханы ў іншую жанчыну.
У нядзелю раніцай балет "Казка аб трох парасятах", а ўвечары - балет для дарослых Людвіга Мінкуса "Дон Кіхот".
Сюжэт кампазітар Мінкус пазычыў у Мігеля Сервантэса, але гісторыя летуценніка Дона Кіхота стала фонам гісторыі кахання дачкі карчмара Кітры і цырульніка Базыля. Гэта балет-феерыя з яскравымі касцюмамі і харэаграфіяй. Упершыню ў ролі Кітры на беларускую сцэну выйдзе Людміла Хітрова. Памятайце, што ў нядзелю пачатак вячэрняга спектакля а 18-й гадзіне.
Міжнародны фестываль дзіцячых танцавальных калектываў пройдзе ў нядзелю на сцэне канцэртнай залы "Мінск". Нясумных выхадных!
Рубрыка "Праменад"
22 марта 2019