Рэпетыцыі конкурсных нумароў, якія гледачы ўбачаць на дзіцячым "Еўрабачанні", завершаны. Сёння на "Мінск-Арэне" юныя выканаўцы адточвалі свае выступленні і ўносілі апошнія карэкціроўкі.
Яшчэ 10 краін-удзельніц правялі індывідуальныя прагоны, па таймінгу на кожнага выканаўца адводзілася не больш за 40 хвілін. Гэтага часу дастаткова, каб развесці нумар на пляцоўцы і ўбачыць эфірны варыянт шоу ў праглядальным пакоі. Рэпетыцыйны марафон завяршыў дуэт з Італіі.
У другой дзясятцы краін дзіцячага "Еўрабачання" сёння вольны час. Аднак замест прагулак па горадзе шматлікія ўдзельнікі наладзілі "вакальныя сесіі" прама ў еўрадоме.
Канкурсанты не расслабляюцца, бо заўтра - генеральная рэпетыцыя, на якой свой вердыкт вынесуць нацыянальныя журы з 20 краін. Для 12-гадовай Фідан Гусейнавай з Азербайджана гэты дзень стане ўдвая асаблівым. На еўравізійнай сцэне яна адзначыць свой дзень нараджэння. Дзяўчынцы споўніцца 13 гадоў. Яна нарадзілася 24 лістапада ў 17:47 - роўна за 13 хвілін да пачатку прагону.
Убачыць шоу ўжывую ад пачатку і да канца і вызначыцца са сваімі фаварытамі можна ўжо заўтра. На сцэне "Мінск-Арэны" пройдзе генеральны прагон. А ў нядзелю - фінальны канцэрт. Пачатак - у 18:00. Арганізатары папярэджваюць: прыходзіць трэба загадзя - хоць бы за гадзіну. Для гледачоў падрыхтавана мноства забаўляльных праграм у фае "Мінск-Арэны". Яркае шоу, вядома ж, убачаць і тэлегледачы ўсёй Еўропы. Прамая трансляцыя конкурсу пачнецца роўна ў 6 вечара ў гэтую нядзелю на "Беларусь 1" і "Беларусь 24".
