Чарговым фіналістам народнага шоу "Я магу!" стаў малады жанглёр Ігар Чыпоўскі. У паўфінале ён паказаў эфектнае шоу. Магія шклянога шара пакарыла журы конкурсу. Сакрэты эксклюзіўнага нумара даведалася і наш карэспандэнт Таццяна Нікіціна.
Цяжка паверыць, што яшчэ 10 гадоў таму Ігар павінен быў жангліраваць лічбамі - у мінулым ён эканаміст. Але жыццё падрыхтавала яму сюрпрыз. Замест офіснай працы хлопец гастраляваў у складзе расійскай цыркавой трупы і зараз гатовы рабіць уласнае шоу. Прынамсі, галоўны нумар ужо ёсць.
Свой матэрыял Ігар знайшоў не адразу. Першы шкляны шар яму прадаў незнаёмец - мужчына проста ўбачыў хлопца, які жангліраваў мячамі на прыпынку. Рэквізіт прафесійны і не б'ецца, сцвярджае фіналіст праекта "Я магу!". Так што яго поспех у праекце залежыць толькі… ад яго самога.
За простымі рухамі тояцца працяглыя трэніроўкі па пяць-шэсць гадзін за дзень. І нават у падарожжы Ігар Чыпоўскі бярэ рэквізіт з сабой.
Перад выступленнем галоўнае - добра размяцца. Зараз Ігар больш часу надае танцу, прыдумляе новыя элементы для фінальнага шоу.