Нацыянальны мастацкі музей Беларусі прапаноўвае новую выставу з серыі "Нашы калекцыі". 50 мастакоў - жывапісцаў і скульптараў - юбіляры гэтага года. Алена Борматава - аб тым, як бачаць Беларусь мастакі розных пакаленняў.
Расказвае Алена Борматава.
Забораў. Не Барыс. Скульптар Міхаіл - родны брат жывапісца. У фондах Нацмузея прадстаўлены ўсяго адной работай. Яна і выстаўлена на часовай экспазіцыі. 80 твораў - ад рэалізму да абстракцыі. Пейзажы з краявідамі Беларусі і нацюрморты, дзе складана распазнаць прадмет. На першым плане эмоцыя мастака, яго ўражанні ад натуры, а не сама натура.
Валянціна Вайцэхоўская, вядучы навуковы супрацоўнік Нацыянальнага мастацкага музея Беларусі: "Аб нейкім канцэптуальным выбары тут гаварыць не прыходзіцца. І таму прадказаць, як будзе выглядаць тая або іншая выстава, вельмі складана спачатку. Гэта выстава атрымалася ў выніку выставай кантрастаў. Кантрастам у творчасці аднаго мастака розных перыядаў, кантрастаў у інтэрпрэтацыі рэчаіснасці розных эпох".
Мастацкая Беларусь у розныя гістарычныя часы. Самыя раннія карціны датуюцца трыццатымі гадамі мінулага стагоддзя, познія - напісаны літаральна пару гадоў таму. Калектывізацыя, індустрыялізацыя, Вялікая Айчынная вайна, мірная Беларусь, адраджэнне духоўнасці - тэмы, якія заўсёды ў топе беларускай артгаліны.
Мастакі розныя па часе і стылях. У іх розныя школы і педагогі. Іх аб'ядноўвае адно - усе стваралі нацыянальнае беларускае мастацтва. А яшчэ бягучы год юбілейны ў іх біяграфіі. Камусьці сёлета спаўняецца 50, а камусьці магло б споўніцца і 120. Многія з творцаў нават і не перасякаліся па жыцці.
Групавыя выставы, дзе разам прадстаўлена творчасць адразу некалькіх дзясяткаў мастакоў - жывапісцаў і скульптараў - сталі традыцыяй у Нацыянальным мастацкім музеі. Іх ладзяць амаль дзесяць гадоў. Гэта дае магчымасць паказаць гледачу палотны, якія ніколі не выстаўляліся ці дэманстраваліся вельмі рэдка.
Наталля Сяліцкая, намеснік гендырэктара Нацыянальнага мастацкага музея Беларусі: "Гэтая выстава заўсёды адкрывае для шырокага кола наведвальнікаў тыя імёны, якія не на слыху. Часцей за ўсё гэтыя мастакі не горшыя за тых, каго мы ўжо ведаем. Але гэтых мастакоў нават няма ў пастаяннай экспазіцыі, але ў свой час яны ўнеслі вельмі значны ўклад у беларускае мастацтва".
Амаль усе работы з запаснікаў музея. Некаторыя аўтары на выставе прадстаўлены некалькімі палотнамі, некаторыя адной карцінай. Той адзінай, якая і ёсць у фондах.
