Ледзь больш за тыдзень да дзіцячага песеннага конкурсу "Еўрабачанне". Ужо заўтра беларуская дэлегацыя ў поўным складзе адправіцца ў Сафію, каб пачаць падрыхтоўку на сцэне 15-тысячнай арэны "Армеец" - конкурснай пляцоўкі гэтага года. І хоць час пакаваць чамаданы, не сустрэцца напярэдадні ад'езду са сваімі сябрамі і калегамі Руслан Асланаў проста не мог. У адным са сталічных клубаў сёння днём праводзілі беларускага ўдзельніка. Хто прыйшоў падтрымаць юнага артыста, ведае Ніна Мажэйка.
Багемнае месца запоўнілі дзіцячыя галасы. Праводзіны Руслана Асланава прайшлі не дзе-небудзь, а ў адным з самых фешэнэбельных клубаў Мінска. Дарэчы, час для правядзення вечарынкі выбралі паводле ўзроставай катэгорыі - яшчэ пры святле дня аднакласнікі, сябры і калегі па цэху прыйшлі правесці беларускага дэлегата на дзіцячае "Еўра".
Uzari, спявак: "Мне, шчыра кажучы, прыемна, што ён прадстаўляе краіну. І ён прадстаўляе з годнай песняй. І, я ўпэўнены, што Белтэлерадыёкампанія зробіць усё магчымае і немагчымае, каб гэты ўдзельнік годна прадставіў краіну, таму як усё для гэтага ёсць. І згуртаваная каманда Белтэлерадыёкампаніі, і хлопец".
Канапы з чорнага аксаміту замест крэслаў і школьных парт. На свяце з дзіцячым рэгламентам, але сур'ёзным падыходам гасцей можна было ўбачыць і ў вытанчаных капялюшыках і нават у белай кашулі з бабачкай.
Замест вітальнага слова - песня. Так прынята ў творчым асяроддзі.
Вакальны марафон працягнулі і госці Руслана. Сказаныя на дарогу словы перарывалі імправізацыйныя акорды.
Першымі цэнзарамі Руслана Асланава, а дакладней, яго кліпа на песню "Чараўніцтва" сталі гледачы тэлеканала "Беларусь 1". Прэм'еру яшчэ раз паглядзелі і сярод блізкіх. Ролік з'явіцца на сайце дзіцячага "Еўрабачання" і медыяхолдынга.
Руслан Асланаў, прадстаўнік Беларусі на дзіцячым конкурсе песні "Еўрабачанне-2015": "Тут сабраліся ўсе мае сябры, усе мае блізкія, дзеці з нашага нацыянальнага адбору. Проста мы так пасябравалі. Я рэальна вельмі рады, што яны прыехалі".
Апроч стоек з мікрафонамі, спатрэбілася месца для танцаў - вечарынка перарасла ў дыскатэку.
А вось і кульмінацыя творчых праводзін - гіганцкі торт з лагатыпам дзіцячага "Еўрабачання". Эксклюзіўны заказ выканалі спецыяльна для дзённай вечарынкі літаральна за дзень.
Еўравізійны торт разрэзаў Руслан асабіста. Першы кавалак - маці. Другі - сэнсею - вакальнаму прадзюсару Руслана. Яны ж суправодзяць артыста на конкурс. Ужо заўтра ў 14:30 беларуская дэлегацыя вылеціць у Сафію.