"Маладыя таленты Беларусі" - праект Першага канала Беларускага радыё - сёлета адкрыў паўсотні юных здольнасцяў.
Сёння ў вялікай студыі Домарадыё прайшла цырымонія ўзнагароджання лаўрэатаў і дыпламантаў шостага музычнага спаборніцтва. Тут жа адбыўся Гала-канцэрт маладых зорачак. Конкурс заваяваў ужо любоў аўдыторыі, у яго ў партнёрах Вялікі тэатр Беларусі і кампанія "Мьюзік Лайн". Спецыяльныя дыпломы і сімвалічныя медалі прадстаўнікі розных рэгіёнаў атрымалі за яркі сцэнічны вобраз, творчую індывідуальнасць, артыстызм і стыль. Сярод жа трыумфатараў форуму мінчанка Зіна Купрыяновіч з Гран-пры ў намінацыі "Эстрадны вакал". У "Спадчыне", заваяваўшы Гран-пры, лепшай стала Патрыцыя Свіціна. А сярод прадстаўнікоў інструментальнай музыкі Гран-пры ўзяў Уладзіслаў Хандогі.
Конкурс дае музыкантам права актыўнай ратацыі ў эфіры першага канала Беларускага радыё. 14 студзеня ў студыі Белтэлерадыёкампаніі "600 метраў" адбудзецца запіс тэлевізійнай версіі гала-канцэрта пры ўдзеле пераможцаў. Шоу будзе паказана ў эфіры тэлеканала "Беларусь 3".